ما مهضوم / طه التميمي

الى ولدي الشهيد ابو فرزدق سداد التميمي الذي استشهد في الجانب الايمن من الموصل يوم 19/3/2017
ما مهضوم اشيعك يل شلت راسي
موت العز وسام ايقلد احساسي
بس نشدت (فرزدق) ما تطفي النار
تشعلهه واحس اللهب بنفاسي
يا فانوس بيتي ودرع سور الدار
ما ادري افراگك ها كثر قاسي
شابرتك شهامه وحب وطنه البيك
ما خيبت ظني وضاع مقياسي
نومست المدينه اگطعت روس اعداك
طلعتك عراضه وزفتك ناسي
يحتار الشعر لمن اسولف بيك
المن يعتني والمن يبه ايواسي
امك... زوجتك... اطفالك الحلوين
يا حزن الينوّن صدر قرطاسي
بنات افكاري رفضن ما يجن سهلات
نكرن آني ابوهن تشهد اكداسي
ونكرن يا (سداد) اشلون اگضي الليل
بعدك يل عفتني ابطرگ وهواسي
صح العمر طوح والسنين اهواي
بس لسه ابشبابي وقوتي او باسي
إذا ناده الوطن كلنه جنود انصير
من حب الوطن ما اعلن افلاسي
آنه ابن الحزب وافكاري تملي الكون
واحدنه ابشموخه ايظل جبل راسي
واخافن يا حزب تسألني المخلوگ
آنه ابن الشيوعي الآخر انفاسي
آنه ابن الشيوعي الآخر انفاسي