المقتل / كامل الركابي
- التفاصيل
- نشر بتاريخ الخميس, 05 آذار/مارس 2015 11:24
تبچيعدها الليله
مقتل ع الحسين
الابن
ضايع بالحروب
الدم ضيوف
تْسيِّر ْبوكت الغروب
الوجه مايل للتحجر
والشحوب
وينخر ابعظماتها
الهشة الهزيلة
الخوف من
غدر السنين
وهي تبچي الليله
مقتل ع الحسين !
من سنين
النهد مالامس
ورد
وجه الحبيب
وطيفه
ترس العين
ما لحظه يغيب
مرض هوّ الحب
لو هوّ طبيب ؟
مفرّعة وتلطم
على حس النواعي
والنحيب
والصدر محفوره بي سچين
ما خذها الونين
هيّ هاي الليلة تبچي
عدهامقتل ع الحسين !
ع السجين
وع الحبيب المات
من حفنة
اسنين
وعلى الغايب
لاخبر
منه ولا نسمه تلوح
وعلى البيده
من العمر
ماخذ الروح
ع النوايب والصرايف
والفقر والجوع هيّ
أُم البنين
عدها
كل يوم
بتوالي الليل
مقتل ع الحسين!