لا ما نتعب / رحيم يوسف

إلى الذين يراهنون على تعب المتظاهرين إلى سياسيي الصدفة.

لا لا لا

لا ما نتعب

لتظل برايك متعصب

وتراهن عالوقت وتتعب

لا ما نتعب

لليضحك على هاي الناس

واللي ايبوك بلايه احساس

واللي ايفجر بينه ويقتل

واللي مطنشهه وما يسأل

هاي الساحه وخل يجرب

لا ما نتعب

كل يوميه انكظلك بابك

ونهز عرشك ويه اصحابك

باوع شوف حشود الناس

متفيدك صبّه وحراس

ما تلحك تشرد من نغضب

لا ما نتعب

الضيع وطن وما يهتم

خل يراجع زين ويفهم

نكلبهه الدنيه وما نكعد

خلصن ساعاتك شوف وعد

احذر بركان الشعب يشب

لا ما نتعب

خلصنه الصبر وعدينه

واشكد ظيم وما طخينه

الراس يلامس بالغيمه

عراقيين بنخوه وشيمه

واللي يريد يجرب يتعب

لا ما نتعب