وحشة الليل او ضواك / سفاح عبدالكريم
- التفاصيل
- نشر بتاريخ الأربعاء, 10 شباط/فبراير 2016 19:10
الى الشاعر الكبير علي الشباني
وحشة اسنين العمر غطت سماي
، إو سافر بروحي التعب والهّم نزيف
"يا علي".. اشگد واهس ابدمك خذاه طول الرصيف
ناسي جرحك نهر بشطوط العراق،
، والظنون البيك شايلهن مضيف.
او خاطرك ليل السهر يرضي صفنتك
، تركض او مامش فصل يشگف خريف
او صاحبك عالباب يتهجه خطوتك.
، يلنهارك خضّر ابوجه الزمن بوسة شريف
، ماخذك سيل الاغاني وانته لسه اربعطعش.
تنعه روحك بالمحطات البعيده
، طورّك إيرتل عذابك ينده أسرار الليالي. گبل ما الساعه إثنعش
هذا مركاض الشعر يصهل ابراسك يا غريب
الموت مو آخر جرح يطعن صفنتك "يا حبيب"
"إحسيّنك".. إبطول العمر جرحه صليب.
گمره بيك إهواي نتلمس دربها، إتصحي بينه المستحه والذكريات
تنهض ابطولك ولا عالذل تبات
ذاكه إنته انسان يتوضه ابجرح.
تنهزم منك ليالي والشمس بيدك رمح
يلضميرك ما رضه إباطل خسارته ربح
استاهدّك من الزغر موحان گيض
الضحكه بعيونك "نبي"... إتحزمه اجروحه والزلم متروسه غيض
الليل مستاحش ابصبحك.. هايبو گلب النظيف
استاهدك ما تنتحني اللعبة الموت
اشلون دگ بابك عمه او ثلج الصوت!؟
، وانته طبعك تلعب ابكل الفصول
البيك خيعونك رفض مشي الخدر
منتچي الروحك تذل ليل التتر،
تطعن، الدفله او خضارك باقي أثر
إنته بأول شوگ طگ بيك الوفه بيدر حصاد
داير ابراسك طعم فجر العراق
، تمشي "واترابك حبيبي المر".. حلو.. إيطيب الخواطر
سفره "لأيام الشمس"... صوغه او مشاعر
خطوتك بالريح هيبه "ركضة إصفوف العساكر".
آنه ما شايف نهر بالزود يطفح مستحاه
يا طعم برحي.. التحلت بيه لهاه
تمشي ويه الغيم صحوه إمن السواجي، إتفرح ابساتين أهلنه
هذا دربك گمره ليعون الفخاتي
، ارموش مليانه دفو اتهفي البسكوت
"لو دره البلبل بواچيه غِنه يبلع السانه او يموت"
اتدور بيك الدنيه ناعور او تغني، ما خذك صوت اسطوانه.. يا هوانه!
غني كل ما بيك غني فوت يا مركب هوانه.
"المشتعل گمره حبيبي"
الناي عندك مدرسه انصحي ابلعبها... نشتكي بيها عليك
، فرحه بعيون الزغار إلي تحب.
تبچي ليلك من حنين الهور والبردي إو غرامك،
ليل ماساتك عراق البلحزن ودع ارموشه،
امنين ما نشوفك نجم يهدي المسار
ابيا دموع انوادعك يا خبز حار..،
فزة اعيونك معاني اتغربل إبمرواحها إسنين العذاب
"وين رايح بالمحبه ابروح ما خضر سعفها" البيت الشعري للشاعر طارق ياسين
"طارق".. اتشوفه "عزيز".. إو من "لطيف إحسين" شايله خجل
جيت أو حتي الريح لو عندك خبر
يا حلم متروس باشكال الاغاني والصور
طيرك الفضي ابسمانه، من لگاك ابلاجرف سكته انتحر
من زمان اتفرهد اعطور البنفسج.. گلي من جابك على جرف الرمل
انته مو راحل ترى باقي أصل