كافي نموت / محمد علي الخفاجي
- التفاصيل
- نشر بتاريخ الجمعة, 02 كانون1/ديسمبر 2016 17:39
نظل ليا وكت طيبين يكشخ بينه چـم تابوتكافي نعيش
وكت بيه اليموت يعيش
يونس عاش بس بالحوت
و ليش نخاف
ربك ما خلقنه چتاف
نـگضي عمارنة جنانيز
و گد ما نمشي بالتشيع
بينة المـگـبرة تنشاف
و من وعينه
چان ابونه يوصي بينه
يا حبايب خوش موتو
فشلة ملچ الموت يزعل شرد اكله
ولدي ميموتون زين
و هي دين...الضحكه دين...
نعيش دين...نموت دين
وحته من يموت واحد
الفاتحه نسويها دين
و هي هيـچ ..الدنيا ظلمه
شما نكاسرها بضوه ترجع جديد
العاش عمره بسجن ظالم
ما يحب طاري الحديد
و كل عمرنه...
تمشي ويانه المدامع
ممشه جنازة ونعش
و گـلت ليش؟؟
خل افكر..و گـمت افكر
و صارت بعيني الحقيقه بشكل واضح
فرشت عيوني فرش
ذاك ابراهيم واگف
بيدة سجينة مدامع
يذبح اسماعيل ضحكه
و ربنه ما نزل كبش
مدري ليش
الصوچ بينه.......مدري بينه
المهم ... تالينه موت
و عود سهله
نطرش اعله الموت زلمه
نبلغه كلمه
و نعقد وياه اتفاق
انعيش كلنه......نموت كلنه
يقبل نظل بالعراق
ولو رفض فورا نسافر
لا... وين اسافر..
الحظه عاثر.... تحله بعيونه المـگـابر
عنده كل الدنيا صعبه
والحزن كلش سهل
حاله حال الـگـطن عايش
بيد كل نداف ويوگع
لابد يشبعه كتل
و يا الهي ابيش احلفك
بالسواتر.....
البيها كوم احلام ضاعت
الحچيته چان شكوه
وهسه عندي وياك نخوه
ربي اريدن گـاع حلوه
بيها بس سوالف امي
و ناس طيبه.. وچم حمامه
و كون ما بيها عمامه
عدها دين الله سوالف
بايگه فلوس اليتامه
و هم اريدن دوله حلوه
كون بيها الضحكه شيخ
يعزب الفرحه بمضيفه
و كون اهل البيت بيها
توزع مراد بصريفه
و كون بيها الحب حلال
اي حلال المامشه بدرب الخيانه
و ما عرف لبليس فال
اي حلال وشنو المانع
هو اصل الدنيا حب
ومن بده من السماء
ربنه سوه الكون كله
چي يحب شما يشاء
و بالنهايه
قبل لا انسه الهي
انظر بعينك عليه
بداعت العباس اريدن
ذيچ البالي اليه