سدرة وشباط وأمل / طارق حسين

أبيتنا الريفي العتيك

سدرة من تاريخ جدي

جنت أسميها (محنه)

وجانت إتسميني (أمل)

! مدري ، مل

المهم النيه بيضه ، ولاعلى النيه زعل

جانت تسولفلي كلشي

عن أبوي ..

الباع كلشي

وشترى بحلمه وطن

عن أخوي ..

الكسر خشمه الحرس قومي

وما كفر بعصابة أمي

عن أمن عينه علينه

وين مارحنه وإجينه

عن سجل.. أبلايه ظل

شباط ذاك شباط الأسود

جرح ينزف

على طولك ياعراق

والقطار أسمه قطار

فتنه مليانه دواهي

وإنته ساهي

الماي من حدرك جرى

وصار اللي صار وجرى

ومن هذاك اليوم لليوم أنحصد

ما جناه شباط وإحنه إبلا رشد

آخ ..ياجرحي الغميك

آخ ..يابيتي العتيك

سولفنلي

عن أمس

واليوم

ولباجر بعد

عن ضوه الفانوس وطلوك الرعد

بلجي هذا الجيل ما يخطي بعد

بلجي من تخبط

يفز طير السعد