عذراً كَرايبي/ محمود الجبوري
- التفاصيل
- نشر بتاريخ الإثنين, 21 نيسان/أبريل 2014 17:27
سمعت من جدتي أم أمي أن ابن عمها الشيخ حسون قد طلب فزعة عشيرته لأبن اخوه , كونه قد رشح للأنتخابات هذه المرة ولكون الشيخ حسون ربنا يطول النه بعمره خوش زلمة لازم نفزع لأبن أخوه هاي المرة وننطيه أصواتنا , مهما يكون , لأن ابن اخو شيخ حسون اذا فزعناله هاي المرة راح ما ينسانه من يصعد , يعني حتى لو بس الصيت ( ابني يعني بس تكول كرابة أمي بالبرلمان كافي هاي الجلمة راح تسويلك مكانه بين ربعك واصدقائك بالدوام وبالدربونة ) طبعاً هذا كلام جدتي . ومن رحت للتعلوله بربعة شيخ فرحان اليوم بالليل لكيت ولد عمي كلهم ملتمين ومسوين مؤتمر انتخابي جبير ويدعمون ابن عمنه من رابع ظهر مزهر المحامي الي مرشح هالسنة للبرلمان , ورايد الفزعة والمونة من عمامة وأهله ولازم يفوز بأصوات عشيرتة وكرايبه واصدقاء كرايبه.
هو صدك جذاب ومو خوش ادمي ومن جان مدير ناحية ما فادنه ولا كلبنه بس أحنه لازم نوكفله، لأن هذا أبن عمتنه ومن عشيرتنه , ونصرته واجب , هاي شلون طركاعة , أني راح أنتخب منو ؟؟ والله حيرة , زين صديقي جاسم أبن عمه مرشح للبرلمان وجاسم لازكلي هالمره صوتك ألنه , وعيب عليك اني اخوك , ومن حقي عليك ان تنتخب ابن عمي وبأعتبارك منتخبني و واكفلي بشده , زين يا جماعة الخير الناس المثقفين بالتلفزيون وبالشارع كالبين الدنية أنتخبوا الزين والمثقف والكفوء , والي عنده خبرهبالسياسة وبالاقتصاد وبالأمن , لا ابن اخو شيخ حسون عنده كل ذني ولا ابن عمتن من رابع ظهر يفتهم بهالشي ولا ابن عم جويسم , هذولي كلهم كجة مرحبه وي السياسة ؟؟ زين أحنه لو انتبخنا ذولي فهم علم وي السياسة.. وراح نبقه طيب وطاب بهالمفخخات والانتحاريين، وطبوا الفلوجة، وطلعوا من البصرة، و هددوا كردستان .
عمي ولد عمي وكرايبي وكرايب جيارنه وكرايب اصدقائنه وخوالنه وعمامنه , أعتذر منكم هالمرة , هاي المرة انريد نصوت للعراق وللسياسيين الحقيقيين حتى يخلصونه من المعمعه الي احنة بيهه , خايبين جا هية وليه لو كونة بين العشاير , لا راح انتخب هاي العشيرة ولا ذيج , أني راح أنتخب اصحاب المشاريع المدنية والسياسية الحقيقية , راح انتخب الي عدهم مشروع للعراق , لأن هاي مرحلة حاسمة ومابيهه مجاملات على احساب الدماء ..عمي هاي دماء يعني دم اخوي وأخوك وابني وأبنك , يعني الي يزعل خل يزعل , او الشغلة ما بيهه زعل وهيه مو مال فزعات ولا مال عشاير هاي سياسة وتقرير مصير , غلطنه بالانتخابات السابقة وكلمن انتخب الي مثل مذهبه وعشيرته و ابن عمه , وكلشي ما حصلنة غير موت بموت بدمار .
عمي عيب عليكم يا كرايبي , خلونه ننتخب الناس السياسيين الي يعرفون معنى السياسة صح , ولعيون العراق لازم نختار الصح هاي المرة والي يريد يزعل خل يزعل , بعدين نراضيه , يوم الي تفرج على العراق , ويبين الصح من الغلط , يوم تتلاكه الوجوه ونشوف العراق مدني ديمقراطي , أمن ومزدهر وراهة راح تكولون ألف رحمة على والديك صدك جنة واهمين ,
فيا ولد عمي وكرابتي
عذراً وألف عذراً