قال عبيد آل مبارك، بعد أن استغرق في ضحكة طويلة : يا من شراله من حلاله علَّه!

قلت: أبو مالك آنه روحي طالعه ونته ايريدلك گلب ما مدشن.. احچي سالفتك وريحني واستريح..

قال دخلت غرفتي ام مالك في وقت متأخر من ليلة البارحة وجلست قربي بحميمية وقالت: ابا مالك اشوكت الله ينفخ ابصورتك ويهديك، ما طول ما ظل عمر يسوه وتتوكل على الله وتروح للحج بلچي الله يغفرلك. واسمك ايصير (حجي عبيد) وتبطل التفرفر بالتلفزيون، وهاي حلوه.. وهاي تكتل.. وذيچ طويله وهاي گصيره، وتستحي على شيباتك؟

ضحكت وقلت لها: والله يا ام مالك سالفتچ عدله مثل المطوه!! وآنه حته اطلع من خطيتچ فكرت اوديچ سنة الجايه للحج.. ما طول صار الموت هناك سهل حتى لو برج طايح عليچ.. لو فندق محترگ..لو مخنوگه وصاير چتلچ رفس وخلصان منچ ومن مقترحاتچ النووية!

أدارت وجهها ناحية التلفزيون وجحظت عيناها وهي ترى راقصة تتلوى على صوت اغنية جميلة لأم كلثوم.

التفتت ناحيتي قائلة: حسبالي تسمع موعظة حديث.. وتبطل سوالف الشيطان.

قلت: بويه آنه شبعان مواعظ من زمن مله جبير ابو الدجاج.. واعرف الشيطان وادري اشلون يتناسل ويتكاثر.. چا انتي يا ام مالك ما تشوفين الشياطين اشسووا ابلدنه من نهب وبوگ واختلاس وخطف واغتصاب، ويتبدلون كل ساعه شكل، ساعه لحايه وعمايم.. وساعه ربطات ونمانم، ومن تنشد على الواحد منهم يگولون هذا مصلي وصايم. ورحم الله من قال:

صلى وصام لامر كان يطلبه

لما قضى الامر لا صلى ولا صاما

قامت غاضبة وهي تقول: بعد شگلك؟ ونته مثل (العتوي) اذبك على راسك اتطيح على رجليك.. ثم تركتني اضحك وذهبت الى النوم.

قلت يلله ابو مالك آنه اليوم عازمك على ريوگ..

قام معي ودلفنا الى مطعم صغير قريب. وحين جلسنا جاء السفرچي وسأل ابو مالك: اشتاكل حجي؟ رد ابو مالك وقال له: (.. حجي انت وابوك).