رسالة مفتوحة / طارق حسين
- التفاصيل
- نشر بتاريخ الجمعة, 07 شباط/فبراير 2014 12:45
لمناسبة الذكرى الثمانين
الى مسوؤل.. مع التحية
المقدمة
مو سياسي..!
بس على اچتافي عبر أكبر سياسي
وبدل ما ينطيني ايده..
بدا إيساومني اعلى راسي
آه..
من عهر الكراسي
القصيدة
گتلك طويل الدرب
بس بالمشي يگصر
والما حسب خطوته
بأول حجر يعثر
80 عمري اشرفت
والگلب بعده أخضر
لا بدلت صاحبي
إو لا حالفت ع الشر
- - - -
مديت روحي جسر
للصحبه والخلان
وصيتهم ع الوطن
أرض وسما وانسان
الوفه منهم وفه
والخان منهم خان
وآنه بزمان الگحط
ما خنت بالميزان
- - - -
إمعودين.. هذا الوطن
كلساع ينزف دم
واحنه بسبب نفترگ
وبلا سبب نلتم
صار الوطن كربله
وكل بيت بي مأتم
هونك يحادي الظعن
ما عاد نحمل هم
- - - -
دربين هوه العمر
لو يسره لو يمنه
من حيث مامش وسط
بعموم وادمنه
الراح قدمومهم
الجاي كل همنه
الماعنده حظ وبخت
ما يگدر إيلمنه
- - - -
خل إنتباصر سوه
ونتجاوز العثره
وتركنه من الأنا
الماحفظت الگطره
شعب العراق ابتلى
والرمح نص صدره
والسبب .. انتو السبب
محد يهم بأمره
والسبب انتو السبب
موش الارض وعره!