اهداء للحزب الشيوعي العراقي / وفاء عبد الرزاق
- التفاصيل
- نشر بتاريخ الجمعة, 07 شباط/فبراير 2014 12:52
فگست عين الحلم خاف يحلم بيك؟
ولك جا ليش ها يفلان
ذايب بيك
انا وعمري شتلته وياك.
بح صوت الجفن سهران يترجاك
يلممنوع
يلمسموح يلمرغوب يلمكروه
يل محلاك
ما بطلت احبك يل فاگس العينين بضواك
عرتني الليالي توسمت بغطاك
تلحفت بضميرك يا دفو السهرات
ولك روح المخدة تنوح تترجاك
چا اذا كان الحلم مجروح
بيش اخضر عتبة الجيران
وباب داري من الصغر متحزمة وتتناك؟
حلم الله اربعين سنين وچم اربعين عليك مرت
يل غاير بجرحي واشربك مر وحلو وارضاك
چذاب؟
لا موش انت التچذب
وتوعد بچذبات حاشاك
لچني شخت وظل وجهي شحوب غروب
وهم بعدني اريدك اولي
واشتكي اليسراك لو غارت علي يمناك
وآخري بس شرط بلا وعد واحلام
موش اتثاوب يا ولك يل اريندك فعل،
فعل ويدير وجه الليل بسناك.
يا ازرك سما الما ساومت بسماك
طهرني من الظنون ارجوك غني
يل قبلة امل بغناك
من حقي عليك غناك
ومن حق الماتوا لعيناك
يخبزون احتمالك والنهر كادود
وبين الماي والخبزة ثلم تلكاك.
20/1/2014
___
( إنت اريدك )
إنتَ إنتَ
إنتَ اريدك
بيـّة بات الـﮔيظ يزحر
وانتشي بظامي وريدك
بيك اهب عاصف بموجه
وبيك اخدر بالشفايف
بيك راحة ليل سكته
وبيك ثوري وبيك خايف
وبيك شمسه
لاذت بكتر الصرايف
وبيك عشّ لذ َة بسرابي
وبيك شامة تعلـﮔت بدلة المضايف
وبيك تعرفني المضايف
والخوافج حدر جدمينك وصايف
بيك نظرة ألَم من ضيم الذوايب
بيك شايف
بيك ذايب
بيك لذّة ألم همسه
بغيمتي ترتـّل نشيدك
إنت اريدك
إنت اريدك
بيك اضم راحات فرغَت
وصوتك عـْذيبي بحنانه
يصب مزيدك
إنتَ اريدك
إنت اريدك
ردت افك حزني بحضرتك
واغفا مدلولة اعلى ﭼفـّك
شاطي للمجداف
لو طاش بعرفتك
يهدا بيدك
إنت اريدك
إنت اريدك
وآنه يلظامي عْلى نجمه
تفيض فزّه
تنوّر بغابر خرابي
دوهناني الثوب الأسوَد
بيدك الترفات تنفضلي ترابي
وياما ﭼلمة موَت تتباهى بشبابي
وياما ياما
وياما ياما
شما اﮔول الياما تخجل
من عتابي
ظلـّت السكتة خضرمه
ولون يتحلـّى بخضابي
أرْد اصيحن آخ
واتجلـّى بحضرتك
وافتح بلوعات بابي
وياك آخر خيط شمسه
وكت الغروب وأهلـّن
مزنة طفله
اتدغدغ بشفـّة عذابي
وأرْد ارد سكتة جديده
ضايعة بوجهك واﮔلــّك
إنتَ اريدك
إنتَ اريدك
أرْد أجيلك وردة لـَﭼمه
بيها شوغة ماي
تغسلني بشليلك
أرد اجيلك ثوب راﮔد
والمسافر ينتـﭼي
بمهدود حَلـَك
أرْد أجي بكتمان عَشّش
موش انا
الكتمان رايد يشتكيلك
هاك انهبني بعرفتك
بيـّة لسّة الروح تتحمّل ثجيلك
خذلي باجي غروب شمسي
أرضى بس ويـّأك لو أمشي ذليلك
أرْد اجيلك
واختل بشهـﮔـة دليلك
خذ ثعابيني تحنـّت سكتة بيضه
تضفر اللـﭼمة برحيلك
ارْد اجيلك
يل حـﭼـي حــْنـَيـْنـَة على شفتك
وهدهدة كاروك جيدك
إنتَ اريدك
إنتَ اريدك
وآنه مسجونة عْلى بابك
يل تفكّ سجني بحديدك
إنتَ اريدك
إنتَ اريدك .