مكتبة / كامل الركابي
- التفاصيل
- نشر بتاريخ الخميس, 03 تموز/يوليو 2014 18:27
الى من يبعث الكتب للناس على الهواء دون رفوف
هذا شي مر
بحياتي ومو
عجيب
مكتبتنا الغاليه
بأنفس كتب
نْدفنت بخوف غريب
كتب گالوا لأمي عنها اعدام
صارت طعم گاع
اندفنت
وضاعت علوم اهل السياسه،
الاقتصاد، الاجتماع
وكتب
گالوا عنها لأمي
هاي يمكن بس سجن
ليل وجرح
نْدفنت ابحفره عميقه
حدر كاشيّة
تساوت
ع السطح
وكتب گالوا عنها نامي
لا تخافي
أدبية !
سنه لو سنتين
لو حفنة سنين
حسب فهم الحاكم
الهاي ( السموم )
وما اكذبِك
هي كل الكتب خطره
والأدب يمكن يصير
بنفس تأثير العلوم
مو كلام
يمكن يصير
ابنفس حكم الاعدام
وحتى نگطع كل سبب
سقط المتاع
خلّي كلها تصير خاله:
طعم گاع !