حسن سريع / عريان السيد خلف
- التفاصيل
- نشر بتاريخ الثلاثاء, 02 تموز/يوليو 2013 21:05
جزاك اللوم يا من خلفت ونه
قرير العين نام ابگبرك اتهنه
تمنيت اعله رشاشه التعط بارود أوسدنه
تمنيت القميص ابدمه عالنجمات أشرنه
ردت يمه حسن..
رسمك على الحلوات أزفنه
اعلگه ابحايط الغرفه ابشرايط دم اخضبنه
ويگولون البگه ابراسچ
وگلهم لا حسن ما مات..
اضحكت من گالوا ابّونه حسن يرجع بعد هيهات
افكن شيشة الريحه وكتنهه على النجمات
وطلع عدة زيانه وحضرنهه
وعدّل ربضته التزهي بمسج وبطيب أرشنه
ولون بنته تظل تبچي ابدرب حزبه لحطنهه
واعلمهه تنعي اتگول ثار المات أريدنه
وبنات الطرف يلتمن عليها ابشوگ وبهمه
تگللهن فرد چلمه تعرفن بتمن اتسمه
تشغر روحهن تخنگهن العبره
يونن چن حمام الدوح من ينوح سيصبره
وتزهگ روحها وتنحب ونيران الگلب كبره
تمنيتك يبويه اتطلعك الغبره.
- لا تبچين.. لا تبچين.. ابوچ الحزب يبنيه
يگصلچ ثوب ويربيچ وتشوفين حنيه
وكل مفصل لبوچ الناخذه ابميه..
- آنه ما گول مات ولاني حزنانه
لچني ماله الدنيا يعمي وروحي لعبانه
حشه اجنود المعسكر كون تنسانه
اگصلك من شعر راسي وخذها ابطارف البيرغ
وخذني الگبر ابوي الفجر من يبزغ
وخليني انچفي يمه يعمي وانتحب وانشغ
ودچن وشد من عزمه وهلهله
وخلي يرهب الدنيا وگلب كل خاين يسله
وگله اللي يخون الحزب يا ذله..
عريان السيد خلف
3/9/1963