ادب وفن

تاريخ الشهادة* / ناظم السماوي


ثابت . ما يطيح..!!
وعامر يظل هاذه الحزب
ما طول التشيل اچفوف هاي الناس
النخوه . المستحه. الغيره. الشرف.!
فكر الحزب تاريخ.!؟
إلنه. والزمن ظل شاهد ومقياس
فرق ما كو فرق ما بين لون ولون
صاد وجيم.!
يتساوه ابفكرنه. الملك والكناس
والمنجل يظل حتماً صديق..
ايعاشر الچاكوچ.. وما يستغني عن الناس.
إذن..
هاذه العشگ.. ميرافگ الزنجار..
ولا طبع النعم يتلاگه.. ويّ الماس!
ويهل ماشي الحزبنه.. سلمنه
واخذ كل لون ورده.. سلمنه
گله احنه الشهاده.. سلم النه
الشهاده للحزب اجمل هويه
او سجل .. سجل..
ياعزيز المابچه من الموت.
سجل .. كل شهيد ايطيح..
رفعة راس..
سجل.. دمعة المالوم.. ترس العين
نزلت دم حَمَرْ.. شرفت كل قرطاس
سجل..
يا ضمير الصدگ لو تعتاز
كل هاي الچفوف.. العازتك حراس
ويلبيك إنعدل ميزان ميزان هاذه الكون
يا كعبة شرف.. مرسومة عالكراس
مجبور انتخيلك وانته ضي العين
ومجبور ابعشرتك يا گمر بالكاس..
انا بالگيظ اخذتك نهر تمشي وياي..
وخاويتك اچفوف الجيتك تنباس..
او بجبال
الوطن هاي الاصابع نار..
من حضنت تفگهه. وشبگة الترباس
إذن لا باس.. يابه لا بس..
من صارت مشناقهم.. مراجيح لزلمنه..
وحفله من اعراس..
اذن – لا باس..
من تمطر الدنيه بالهلاهل ماي..
وّ صواني الشمع تتعنه خضر الياس..
اذن..
يا هوه البّل المشخاب.. وحيهم..
يمرون . اعله اهلنه..
اهل الملح والزاد..
وفايه تظل ارگابهم..حد شهگة الانفاس
وحيهم..
فرات الزلم سرگيهم أبد ما ذل
ول خد الحزب بالعايزه ينجاس
وفرات الحدر امن جبال كردستان
يسلم.. عل الجنوب..
وكل اهل غماس..
إصبر يا حزب.. ولكل صبر شباچ
هم..
ايتاني صبحه ويطرد الوسواس
اصبر.
يا حزب ابگد عطش..
صبر الگاع..
وبگد.. غيرة العباس.
تره دم الشهاده مو فقط تاريخ..
موقف بالمراجل.. صرخه..
من نوماس..
مواقفنه .. أبد مو بس
بچي ودموع
مواقفنه .. ترافه امن المحبه
وشهگه من احساس
دمك .. يا شهبد ايظل علم مهيوب
اشرف..
من صنم ما عنده كل تاريخ..
ونصيحه..
لكل صنم خلّ يعلن الافلاس
ابوذيه
لشعبنه ولحزبنه احنه.. وفينه
وبارد يظل مكسرنه.. وفينه
فهد عدنه وسلام وصارم وحازم
الحيدري العبلي سعدون عوينه شياع .. وفينه
الحزبب انجب زلم هيبه وابيه
مقدمه .. ثانيه
خل يرتاح ..
شهيد الحزب خل يرتاح
لان كل گطرخ من دمه
ترفرف عالمقر يوميه بألف جناح
عدل يفتر يدگ باب الشمس
لو يفگد العشاگ..
ولكل باب يرهم قفل لو مفتاح
تحده ابكل رجوله اشباطهم والموت
انتخه ابفكرالحزب وألتم ضمير وراي رجوله وموت
وصية الحزب ذمه وعاند السفاح
وانه..
ادري النخل مو بالسعف مهيوب
النخل..
ينهاب طوله ابهيبة السباح
وانه
ادري السفن.. لمن تعاند ريح
اليد للسفن تمشي ابهيبة الملاح
الشهيد..
العدنه مو روح وتلمولي اطيور
لا..!!
الشهيد العدنه عايش
بينه عشر ارواح..
وشهيد الحزب خل يرتاح..
لان باب المقر صبح ومسه مفتوح
ومفتوح الزياره..
ابكل حسه ومصباح
ابوذيه
وحبيبي يا حزب يا ذهب.. يلماس
الهوه وي الخدود البحجل.. يلماس
حسيت العافيه ابكل صبح.. يلماس
المسه والصبح بعيونك سويه
مقدمه اولى
يا ديچ الصبح عوعي
وصحي ابصوتك الغبشه
عصافير الصبح خطار بربوعي
يا ديچ الفجر.. ليلك تره سهران
شرب خمرة ودادي وعاشر اشموعي
يا ديچ الفجر سمعني حس كاروك
وطفل شايل محبته يناغي بضلوعي
وارسم عل الگصايب.. نهر من زيتون..
وامسح دم شهبد وغسله بدموعي
واخذ گرصة خبر من حزن كل تنور
او عوز خبزتي وحسبهه من جوعي
ونطيهه الحلگ كلمن گعد جوعان
وخليني ابتلي واكتب بموضوعي
شهيد الحزب ورده امصطره بشيوعي
وهنيئاً للشهاده.. ابكل دم شيوعي
ومضه .. لكل شهداء الحزب
الغالي ما رخص شيرخص الغالي
صعد للمشنقه وگلهه تعالي
شهيد الحزب طبعه ايخوف الموت
بگول الموت اجه خاف وبچالي
ــــــــــــــــــــــــــــــــــــــ
* القاها الشاعر في احتفال استذكار يوم الشهيد الشيوعي