يوم الشهيد الشيوعي / محمود العكيلي
- التفاصيل
- نشر بتاريخ الأربعاء, 18 شباط/فبراير 2015 20:50
الى ارواح شهداء الحزب الشيوعي العراقي أهدي قصيدتي..كل ما اگول وأحچي إبوصفي للطيبين
ما أوفي ابوصفهم هُمّه خير الناس
شيوعيين ضحوا للوطن بالروح
موقفهم بطولي وللشعب حراس
ثلاثه للمشانق صعدوا إبلا خوف
فهد، حازم، وصارم رفعوا النوماس
وتشهد ساحة المتحف على الثوار
فهد بيهه إنعدم باعدامه دك الساس
يوم 14 بشباط ما ننساه
بيه أبشع جريمه نفذوها أنجاس
وكملهه البعث بثلاثه وستين
وبيان 13 خلّه الضحايا أكداس
ضحايا شباط ما ينساهم التاريخ
أهل نخوه وبطوله وتضحيه واحساس
ما ننسى سلام المات بالتعذيب
مشت روله اعلى جسمه ودمه ظل نبراس
وما ننس سلام وكل ضحايا شباط
ولا قصر النهايه إلمنّه شاب الراس
الشيوعيين صبروا عالسجن والموت
وعاشوا عالامل ما استسلموا لليأس
من اجل الفقير اتحملوا تعذيب
وضحوا بالعمر لاسعاد كل الناس
الشيوعيين بيهم يفخر التاريخ
وشهيد الحزب يبقه اسنين رفعة راس
علم يبقى الشهيد إبساحة الثوار
ويبقى اسمه ونضاله للشعب مقياس