قصايد للأصدقاء الانصار / كامل الركابي
- التفاصيل
- نشر بتاريخ الجمعة, 12 حزيران/يونيو 2015 05:58
الى :ابوريتا
العشب والماي والفي
بضفافك ياجميل
رطب
ومعسّل بسمسم
روحك الخضره
نبع وسط النخيل
ياشفلّح
ذايبه شفافه
بحلاوة حمره
عل ميّسم تسيل
الصحه الك والعافيه
ونشوة نبيذ
تسري بعروقك تزيل
ولو ذرة من غبار الالم
والشك البخيل
يا كريم باسمك
وروحك وحبك
احنه متعودين
نحتضنك
محبه
بيها انت البيت
واحنه الغٌربه
عبّار السبيل !
النادلة
الى : عواد ناصر
النادلة المفتونه
بيك اتساءلت
وينه ؟
المبتسم بيكم
الساخر
عيونه
تضحك
بس حزينه
هوّ شاعر؟
انا احفظ
شعر حمزاتوف
احنه اثنين
من نفس المدينه
صدگ گلي
هوّ وينه ؟
عِشرة
الى : ابو امجد
نحيف
الصبر
شگ بروحك
ادروب
ونزل ضيف
بمساكن
خلگك
ايوب
بعد ما ظل عمر
نتفكر الراح
ولا نگدر
نبيع العِشره
ونتوب !
كوكب
الى: كوكب
ابن آدم المجروح
والگنطره بْعيده
واترف اغاني العشگ
نجمه
وحمامتنا
طفّينه بيها صخب
لمّات غربتنه
ومن رافقتنه عمر
حبنه وخسارتنا
صارت صدى للروح
تخفف مرارتنا
تلطّف حرارتنا
وبسر نبضها تبوح:
كوكب
خفيف الظل
ونعشگه
وين يروح !
عدن
الى : ابو ريما وأم ريما
نلتقي
بنقطه
بعيده
من الزمن
انت
جاي من
التواهي
وانا
راجع من
عدن
نقطه چانت
بالرسم
تشبه وطن !
القلق
الى : ابو ريما
الدفو بعيونك
جميل
تگول ماشايف
أرق
سولفتلي
من الصبح
عن القلق
انت مو بس سولفتلي
انت لا
خطيت صوره
ولوّنتها ْعلى الورق
وانا مدري شصار بيّ
چان مدري شلون
مضغوط بسنينه
مثل قنينة نبيذ
شلت عنها التبّدوره
وهو تيار
انطلق!
الطعم
الى : ابو طالب
خدر
من لامس
شفافك
نده الكاس
وزهى
ابطعمين
نشوه
الگلب
والراس
طعم خمره
وطعم
ثغرك
والانفاس !
قطرة
الى : ابو سيف
شتت
حلمنه
الصبح
وانفضّت السهره
وكلمن
حضن غيمته
يتوهم الگطره
وظل أثر منك
حلو
مثل ام طفل
يحبي
كلما يهم
ع المشي
تحتضنه خوف
وعطف
من حُب
ولو سلبي !
مظلوم
اللى: مظلوم
الف رحمه
للوالدة الرضعتك
وتعنِّتك دوم
تدعيلك من الرضا
يحجب حسد
قوم
وتبتهل
للمصطفى
يرفع شأن رايتك
ويزيح من مشيتك
تتجمع اغيوم
ماتدري
كل العمر
لو صرت
فوگ النخل
تبقى
انت مظلوم !
القلب
الى : عمار علي
جا هوّ حبك
عسل
مي ورد
لو مٓنْ سما
لو سكّر
من الحلو
يرتفع
حين وحين
وصوتك
حزن عل الفرح
يتناوب
اثنين
وگلبك
ابگد ما عِشٓگ
مفتوح مرتين!
وسام الاشگر
الى : وسام
من بغداد
للشام
نبع روحك
عكس دجلة
بعد يگدر
بذاك الدفق
ذاك الدفو
يجري ؟
سمارك
غٓش الحدود
وجواز السفر
مصري !
شگد قرَّب عليك
الغاشم
الطيّار من شافك
تلتف وي شجرة
وهو يلتف
نذل ماعافك
هم زين الرصاصة
ابكل معانيها
شافت
ضوه الروح
يفيض بشفافك
غمضت عينها
من مستحه
ومن خوف
وبومضة برق
راحت على اچتافك !