عرس الشعب / علي العضب

إحنه كل العمر من يوم اللي صرنه

جفوفنه بيضه ونذرنالك عمرنه

إحنه من طعم التعب يطلع ثمرنه

إحنه بيت اللي يلمنه

من الگصب والطين والبردي سگفنه

وگاعنه مفروشه من خوص النخل

حصران أهلنه

إحنه كل هذا الزرع الاخضر

سنابل من شتلنه

والمدارس من حجينه

بيهه يتعلم شعبنه

من نشايدنه وقصايدنه وفكرته

طيورنه تحط عالگمر

تجيب السلم عنوه لوطنه

تسگي الزرع من گت دمعنه

جفوفنه تجيب الدفو من الشمس

إشما بردنه

إحنه لابگنه ولا موتنه نمله

ولا سكن غش بكلبنه

إحنه ساهرنه ليالي

كتبنه عالحيطان

فليحيا شعبنه

سنين بهور الگصب

وسنين بجبال الشمال

يطگ تفگنه

جفونه بلون التعب

والشمس ضوت دربنه