نسأل.. انريد الجواب / نجم خطاوي

نسأل انريد الجواب

ليش هذا الصار عدنه

ليش فرهدتو نفطنه

ليش بهذلتو بلدنه

وليش بطاله الشباب

نسأل انريد الجواب

...........

يسأل وحقه المواطن

يريد يومه يصير آمن

يريد توظيف ومساكن

لا تحاصص واحتراب

نسأل انريد الجواب

...........

ليش مسدوده المعامل

ليش نص الشعب عاطل

نسأل أسباب المشاكل

الحاكم اشوده وشجاب

نسأل انريد الجواب

...........

ليش كل هاي الفظاعة

لا زراعة ولا صناعة

بلم ومضيع شراعه

وسفه عنه المرسه غاب

نسأل انريد الجواب

...........

ليش شتتوا شملنه

ليش ضيعتو أملنه

نسأل وحكنه انظلمنه

افعال منها الطفل شاب

نسأل انريد الجواب

...........

نسأل شلون وكدرتو

من اللفف يالماشبعتو

تفرهدون وما خجلتو

بيا شرع وبيا كتاب

نسأل انريد الجواب

...........

نسأل نكول وكفايه

هذا حدكم والنهاية

خلصت فصول الروايه

وحضرت فصول العقاب

نسأل انريد الجواب