لا ما نسكت ... حقنه نريده / نجم خطاوي
- التفاصيل
- نشر بتاريخ الأحد, 18 تشرين1/أكتوير 2015 19:34
لا ما نسكت علّي صارواللي داير واللي دار
نصرخ كلنه زغار اكبار
بهاي الجمعه
و جمعه جديده
لا ما نسكت ... حقنه نريده
...........................
لا ما نسكت عَلْ السراق
والباگو نفطك يعراق
ما ظل نايم شعبك فاق
يحتج والتاريخ يعيده
لا ما نسكت حقنه نريده
.........................
لا ما نسكت عَلْ الباگونه
والمافادونه وضرونه
وبلا مستقبل خلونه
الشعب يرد الحق بأيده
لا ما نسكت حقنه نريده
..........................
لا ما نسكت عل الأوضاع
نغيرهه بهمة السباع
نرده ونكدر حقنه الضاع
والوطن نعمره ونشيده
لا ما نسكت حقنه نريده
.........................
لا ما نسكت كمنه بهمه
نصرخ بالحاكم وبظلمه
تنزال من الوطن الغمة
يغرب حزنه ويشرق عيده
لا ما نسكت حقنه نريده
لا ما نسكت عدنه الحيل
نصرخ كافي طفح الكيل
يا ويله الباكك يا ويل
ما منه ولا احنه نريده
لا ما نسكت حقنه نريده
.........................
لا ما نسكت والشبان
حلفت لتعدل الميزان
لا سارق لا كائن كان
عن الحق مطلبنه يحيده
لا ما نسكت حقنه نريده
......................
لا ما نسكت والتحرير
صارت معلم للتغيير
متوحدين وكلنه نسير
نبني وطن ودولة سعيدة
لا ما نسكت حقنه نريده