مستمع / كامل الركابي
- التفاصيل
- نشر بتاريخ الأربعاء, 18 تشرين2/نوفمبر 2015 19:40
اسمع النحلةتگول
لصاحبتها:
حتى لو تصنع عسل
من احلى زهره
ليلتين
ديري بالچ
هاي سكرانه
على باب البيت
ماتدخل
تبات الليل بره!
اسمع الصرصور
يهمس ويّ نفسه:
لازم انظف
بالغلط
مريت فوگ اجساد
من البشر
نجسه !
اسمع الصارخ
على كل شي
بحياته
گبال شرطي
يوّطي
حسه!
الصدفة
الى: هامبرسوم آرتين
أبد
ماخطرت على روحي
وعلى بالي
اشوفك
صدفة
بعد الاربعين عام
من الغياب
صدفة
ماچانت حديقه
وانت من زغرك
تحب
ورد الحدايق
ومو بشارع
من شوارع حي الارمن
ابيض
ويلمع نظيف
هي مو بس الشوارع
هاي روح الأرمن إلها
بكل بيوت الحب
يظل مفتوح باب
صدفه
سحبت من زمنّه
صوره يمكن تظل
منسيّه
على رف الغياب
ويمكن من تزيحها
يظل بس الظٓهر أبيض
رمادية
ومغوّشه من التراب
الصدفه هيّ
الفاجأتني
وشفتك: ابمطعم كباب
على الفحم
وّج باشتياقي
واعتقد عامل المطعم
كردي من سنجار
نازح
مثلي مثلك هم عراقي!
خبر
الورد جاي
النسمه
نزعت ثوبها
البارد القاسي
وفرّعت
تركض وراي
تصيحلي
وماسامع من الصوت
غير : الورد جاي
چانت تسر لي
خبر عن الورود
الورد شذري
ابيض وللسمه
شاهگ
والضوه عاكس
زراگ
أيبيِّن بصفحة الماي:
من ثگل وزن الوفه
مايل ضواي
الورد الاحمر: ياحبيبي
آنه الك رغبة جمر
وترشني ماي
الورد الاصفر:
من هواك الگاع
ماتحمل لي غيره
ياسماي!
موهوم
العشگ
من التعب
والسهر
غفّه
ونام بهدومه
گعد
ويظن صبح
ماشاف
غير الليل
ونجومه!
اسطوانة
من كثر مارددتها
ودوَّرتها
واسمعت غنوتها
اكثر من الف مره
وعفتها
انفطرت من القهر
وتگطّع نغمها
اسطوانة حبك
من الهجر
مشروخه
ماتگدر
بعد تسمعها
متبدِّل اسمها
وصار :
آية عشگ
منسوخه !