أربع أغنيات للعراق / حسين جهيد الحافظ
- التفاصيل
- نشر بتاريخ الخميس, 07 كانون2/يناير 2016 17:54
1
العراق عراقي
بويه العراق إعراقي
حب إنكتب بأعماقي
ما غيرتني الأيام
إبغيره فلا عيني إتنام
عمري إو نديم أيامي
كل حبي إو أحلامي
بالگلب مو بوراقي
إسمه كتبته إعراقي
** **
دجله إو فرات أحبابي
كل خلتي وأصحابي
منهم روه شرياني
بأفراحي إو أحزاني
بيهم تغني أشواقي
حياك يا عراقي
** **
إبحضنه دفينه إحچايه
شالت معاني إهوايه
الرايح يوصي القادم
سالم وطنه سالم
رغم النوايب باقي
شدة ورد عراقي
2
حيل العراق
شد حيل حيلك يا عراق
ولو دنياك دنيه إمسودنه
يمشن أيامك عذاب
يمشي كل يوم إبسنه
بس إنته ذاك إنته الچبير
إمسنعه بيك المحاچي إمرهدنه
** **
يا بخت نهرين ما شالن دغش
بيهن الترتيل بس لله غبش
شيّع الأحزان وآلامك نعش
يللي إسمك دوم للوادم هنه
ليش أيامك عراقي إمسودنه
** **
يا صباح الخبر حالك أحله حال
والنوارس بسمك إتغني موال
إو صوت فيروزك يردد هالسؤال
بين همسات العشگ و الدندنه
ليش أيامك عراقي إمسودنه
** **
يا عراق الخير يا عز الزمان
يللي سجدة نبي منك كل مكان
يالتگطر طيبه إو تمطر حنان
ترتيل خطواتك يغرد رهدنه
إشجاهن أسنينك عراقي إمسودنه
** **
أمسودنه الأيام خلهن لا تهاب
شنهو داعش شنهو وأشيعني إرهاب
إبغيرة الطيبين وإبعزم الشباب
ترجع الأيام موسيقى إو غنَه
أتعقل العقال ما هي إمسودنه
3
دولاب العراق
دولاب الدنيه إتفر بينه
ما أدري إلوين إتودينه
إلحضن الطيبين إشتاگنيه
وإطيوف الشوگ إتلولينه
وإشحد كل فرحه إتجادينه
فيّ إلگمريه أيغطينه
وإنغنّي أيام الماجينه
إبحب الدنيه إتلولي إعلينه
ننسه الدولاب الفر بينه
** **
يعراق إو حضنك گمريه
وأنسامك هيوه إو چوبيه
خيعونه النام إبسد فيَه
إو شرغد بأحلامه الورديه
شهگة صبحك تسحر هيه
شوف إلعاداك إو تاليه
ما لحگ يكتبله إوصيه
ما چن چان إلسوط إعلينه
فره الدولاب الفر بينه
4
گمرنه الغالي
يا حوته يا منحوته
هدي گمرنه العالي
يا حوته لتبلعينه
هذا الگمر تدرينه
نوره إمضوي إعلينه
موسيقه يطرب صوته
وإعلينه كلش غالي
يا حوته يا منحوته
هدي گمرنه العالي
** **
يا حوته طبع البينه
من الگمر تدرينه
وي لعبة الماجينه
صغنه النجوم إبتوته
وإرسومه گمره إتلالي
يا حوته يا منحوته
هدي گمرنه العالي
** **
يا حوته متگدرينه
مهيوب مايه إو طينه
وسط الگلب غالينه
خضر فيافي أسكوته
حب العراق الغالي
يا حوته يا منحوته
هدي گمرنه العالي
** **
همسه عدب وونينه
نايل حلو تلحينه
إلبينه وإلمابينه
إيموت ساعة موته
هنيالي بيه هنيالي
يا حوته يا منحوته
هدي گمرنه العالي