مرثية للشاعر الكبير بدر شاكر السياب / ناظم السماوي

بدر ما مات..

حي..

باقي بدر ما مات..

خالد للابد ما ينخفت بدره..

واذا مات الغريب أعله الخليج إيصيح

إذن.. ظل الغريب اليسمع الشعره..

بدر.. ورد البنفسج. عالگبر خطار

يوميه يفتح بس إلك عطره

بدر.. حته شناشيلك بچت بالليل

لأن شباچ بيتك يعشگ الگمره

بدر.. حته – بويب – اشتاگلك لهفان

مثل سعف النخل من ينحني النهره..

بدر.. شط العرب

وجهه غريب اوياك

مثل تمثال طولك..

من حزن فجره..

بدر.. شمس العراق أحله

شمس بالكون..

وشمس هاذه العراق

إبكل وكت شگره..

بدر.. حته النوارس سافرت وياك

لأن.. ما مش بعد عينك..

لگت عِشره..

بدر..حته زمانك ما رحم وياك

وزمانك «يا بدر»..

خجلان من عذره

بدر.. چف الصبر

مزروع بيك إهموم

ويا چف.

بالصبر يتراهن إبصبره..

العجيبه.

البيك. روح إتحوم

فوگ عراق

وعراقك روحه بيك

إيطوف عالبصره..

يا فيض الشعر. بسمك يّفيض إعتاب

نزف حته الشعر من

همل ابشعره

افك باب الشعر الگيك

ألف ديوان..

وألگه الوطن همك.. بالگلب جمره

بدر.. قصة حياتك دونت تاريخ

بس تاريخ عمرك

ينحسب عمره..