قصيدتان .. للحب / حسين جهيد الحافظ
- التفاصيل
- نشر بتاريخ الأربعاء, 20 كانون2/يناير 2016 19:09
1) الوفاء إنته
مهداة إلى أعز الأحباب:
الحزب الشيوعي العراقي
أشكثر وأشگد ؟
رادوا إيسكتون صوتك
وأشكثر وإشگد ؟
حاولو ا ضنهم يضيعونك
تالي ضاعوا !!
وإنته ..!!
ذاك إنته الچبير العاليه إمتونك
تسحگ عالمنيه إبهيبة الثوار
مهابه إتطگ مهابه
الغيره بعيونك
مدك نار فنه اليوصل إلمدك
گدك كون إشحده اليوصل إلگدك
أحتاروا بيك !!
وينه اليعرف إشگدك
تطگ إعيون مايك نار
طوفان العواصف ما كسر سدًّك
سدَّك خيمة إمحبين
كل الناس لاذت غافيه إبسِدَّك
شمس إسمك
هوه رسمك
ورسمك
ألأف آه إشحلاة إسمك ورسمك
أود بالروح أخطنك ورسمك
لون تدري شنو إشتحمل ورسمك
سعادة ناس طيب إو أريحيه
يصوت الحگ
ما يوم إلسكت صوتك
مات إلچان يتمنه إبحقد موتك
وإنته ..إنته
هذاك إنته
غنه عشاگ عمرك صار
يحب الناس كل الناس
يحب الطيبه والأنهار
يحب الطير والأزهار
يحب الحب
يحب الصبح وإعيون النهار
يغني للوفه إبكل حيل
ما غنّه الوفه سكته
طريق حگ
محنه إو طيب
يرسم لليحب سچته
يهذا إنته
الوفاء إنته
الوفاء إنته
2) خطار الحلم
إلى الذي جاء بعد فوات الأوان
خطار مر الترف بالحلم
يا محله هل الخطار
قداح نگل الجدم
والخطوه شهگة نجم
شايل إبروحه أسرار
خضر رصيف العجد
أجمل حديقة ورد
أشكال بيهه أزهار
إهناك جوري غفه
وإهناه يطگ ريحان
صوت البلابل لحن
وي نجمة الميزان
متغاوي ينگط وفه
يحضن نده الغبشه
متعافي عشگ الجهل
وإيدور الحرشه
خلني إبجرف صفنتك محتام أتمشه
طيات زلفك مسچ
غطيني أرد اغفه
ريجك .. لماك الدوه
منه المحب يشفه
طول يليل الحلم
إعزم گمرنه عرس
وإعزم محنه النجم
والليل إفرشه غنه
خل نطرد الوحشه
مشتاك أحضنك طفل
يل بالحلم خطار
إبروحي سوالف عشگ
وإعيوني بيهه أسرار
بويه أرد أورجك گلت
وأحچيلك إشما صلر
بگليبي أضمك حرز
مو بالحلم خطار