مناغاة للريل وحمد / احسان احمد حسون
- التفاصيل
- نشر بتاريخ الخميس, 04 آب/أغسطس 2016 16:26
مرينه بيكم حمد ما عدنه كل غايهلوجوه وردة صبح وگلوبنه مرايه
للطيب نمشي بغنج وللخير مشايه
ما بينه حبة دغش صافين من الله
- - - -
مرينه بيكم حمد للملگه مشتاگين
عشنه بهواكم عمر وسنين تجزي سنين
منجوز من عشرتك ميتين لو عدلين
وإن قصرينه بفعل نرجوك سامحنه
- - - -
مرينه بيكم حمد ونمر بعد بيكم
وشما نجي ونعتني من مل لياليكم
محفوره جوه الگلب حلوات اساميكم
ما بينه واحد سلم من الهوه وخلص
- - - -
مرينه بيكم حمد ودمع الفرح ينزل
والشيب طگ ومشه وبكل كتر يغزل
وكل مشتهى لشوفته كبران اجه ويگزل
علمنه درس الزمن بحكامه ما يعدل
- - - -
مرينه بيكم حمد واحنه بهواك نموت
وجناتنه من الخجل تفضحنه من تفوت
ويا طول ليل المحب لمن يحب بسكوت
يسهر يعد النجم ويطلع على المامش
- - - -
مرينه بيكم حمد جس النبض شوفه
والگلب دم ولحم مو ثوب وتروفه
طحنه بلسان الوكت وسوانه سالوفه
وصرنه علچ ينعلچ بلسان هذا وذاك
- - - -
مرينه بيكم حمد ورده على ورده
وكل گلب هام انجرح نسعاله ونهيده
تلگانه مره بيسر ومره بألف شده
يا دنيه ليش الحزن مخاوي ليالينا
- - - -
مرينه بيكم حمد موز بحلات التين
سُمران بينه ملح أبكل زمان وحين
شگد حار دمع الحزن لو بلل الخدين
يا زمن مهما تدگ نبقه ونگول تهون
- - - -
مرينه بيكم حمد والجوري قدح فاح
عنگود عالي العنب مو سهله من يلاح
داير مداير حزن والفرح وله وراح
أمنين اجيب العمر ومنين اردن شاب
- - - -
مرينه بيكم حمد برحي على بربن
حلوات مرن خطف مدري شعَمل ذَبن
شعيون بيهن سحر للميت يجذبن
ويلاه بحر الهوه كل درب بي قصه
- - - -
مرينه بيكم حمد رمان بعگوبه
شگد لعب هذا الگلب ما كفر ذنوبه
يلعايل وي الهوه ثق للهوه حوبه
كل طير يوم وأله فوگ الارض مسقط
- - - -
مرينه بيكم حمد والگلب مو بيده
أعمه ولا يتعض من ذاك اليجيده
ولو تبقه تنصح سنه كل نصح ميفيده
هايم أبحر الهوه غرگان ومطوف
- - - -
مرينه بيكم حمد واحنه بهواك نذوب
ومن ضگنه مر الهجر واحدنه گام يلوب
ولهام مره بهوه لصدگه يوم يتوب
والگال عفت الهوه چذاب ما يصدگ
- - - -
مرينه بيكم حمد مطگات قمر الدين
وكاشان بينه العشگ إشما تمر سنين
وفرض الهوه يا خلگ فوگ العِركَ والدين
والهام وي الهوه متلوحه نار الله
- - - -
مرينه بيكم حمد زوري وسمچ حمري
بلفاله صاد الگلب وبرمشة حز نحري
يترهدن بمشيته أوياه اخذ عمري
لستخطه بيّ ورحم ولا خاف يوم الله
- - - -
مرينه بيكم حمد والگذله شگره تطير
تتمايل وي الهوه والحلوه بيه تحير
شيصير ارد الشَعر بيدي وأصف شيصير
وشيصير بيدي إذا أظفر گصيبتهه
- - - -
مرينه بيكم حمد روبه وخبز تنور
لعيون سود وشِهل حلوات كلهن حور
ونظراتهن من تصد طلقات من اتثور
بالك تصد يا ولد ورصاصه لتلوحك
- - - -
مرينه بيكم حمد فرينه الولايات
بنوات هذا الوطن أبكل كتر حلوات
موحگه ناگص عمر كلمن عشگ لو مات
سبحان ربي شخلق عدنه الجمال اشكال