فوتات الخناجر / عبد الكريم صالح العامري
- التفاصيل
- نشر بتاريخ الخميس, 23 شباط/فبراير 2017 17:14
لها .. من الهمتني الشعر والكفر والضياع
كضّيت اللّيل
ليلك ليل كضيته
اچلّب بالحلم لَيضيع
وبكل عَبرّتي نْخَيته
فُرّشت ارّسوم عالجّفنين
تغافلني وتبوّگ الْعَين
تدرّي بّالدليل بحور حِنّيته
كضيت الليل
٠٠٠
حبّيبي سنين
احصّد ضيمك اوْ هَمّك
عله دروبك نِثّرتْ وُرود
عْمري شماله چا جدمك
افّيض بكل حنين عليك
يلموني وَرِدّن ليك
اطشّر بالمحبه وُعمّري انسيته
كضيت الليل
٠٠٠
اهّيمن بيك
وظّنوني خّذني بْعيد
خضّر كل فرّحها الرّوح
وشِّفافك بَخّيله بْعيد
لاضِحكات تُمطرّها وترّويني
ولاحضّنات من حسنَك تدفّيني
حِلم حَته الحلم يهواي بَچّيته
كضيت الليل
٠٠٠
نِشَدّت العين
وِانْتَه مأمِّنك بيهه
غفّله تكول هاي الرّوح
ضَيّ وطفّته شبيهه
وهاذْ اخر امل بالرّوح
مني ما ارّيده يروح يسّاومني الدّليل واعرّف بْنيته
كضيت الليل
٠٠٠
عَسّاك وياي ذاك الّليل
ورّاويك الحنين شلون
لزرّع كل مسامه البيك
اصابيع ونِفس وعيون
خناجر هالسنين تفوت
مِثّل هجّرك كتل بسكوت
وانه الموت من هجرك
عِشكته وحضّرت بيته
كضيت الليل
٠٠٠
كضيت الليل
اتهجه بمعانيك
قريت التين والزيتون
بعثرته بصوانيك
كِتَبْت ونَكّطِت شامات
وخِتَمت بآيتك ايات
وعصيت بحبك الرحمن
والشيطان رَضّيته
كضيت الليل ليلك موت كضيته