نجمة صبح / محمود العكيلي

ابساع ابساع اشوفن مرت الايام

وحل آذار زاهي ايفوح ريحانه

ربيع وحل علينه ابمجمع الاعياد

اعياده جثيره وزاهيه الوانه

بيه نجمة صبح ما ضمهه حتى الغيم

ضواها احمر يشع معروف نيشانه

يا نجمة صبح ضويتي درب الناس

سموچ الشيوعي وصرتي عنوانه

بيوم الحادي واثلاثين من آذار

انولد حزب الشيوعي وثبت اركانه

وظل يمشي اعلى طوله ما ثناه الخوف

من فكره وصموده ايخاف عدوانه

عاش ابكل عهد ما بايع السلطان

ودافع للشعب ظل صادق السانه

وظل طول العمر امعادي الاستعمار

ودگ روحه نذر تتحرر اوطانه

ظل رافع الراية وقائد الطيبين

وظل حزب الشغيله المرتفع شانه

يا حزب الشيوعي ابعيدك الميمون

كل انسان طيب يفرح اويانه

وهاي الناس طيبه وشاركت بالعيد

ابگلب مفتوح حضرت كلهه فرحانه