ترانيم للذكرى 83 / حسين جهيد الحافظ
- التفاصيل
- نشر بتاريخ الخميس, 30 آذار/مارس 2017 08:47
الترنيمة رقم (1)
إشما تمر إسنين عمرك
إنته ذاك إنته شباب
إحبيب إو إيدك نظيفه
ما دنگت للذله راسك
والشهاده صارت إلناسك وظيفه
بيك كل عشگ الشواطي
جرح كل شوگ المعامل
بيك وإهموم الصريفه
يا نزيف إلما گطع بالحب نزيفه
يملح الگاع يا كاشان يا خامة قديفه
يللي تاريخك مهابه
إو چلمتك ترفه إو شريفه
يا عمر شامخ يلاوي الموت
وأطباعك حنينه
يا عمر رغم التعب
حته بسنين القحط ما ذلت إسنيه
رافع الهامه علم
شوگ للتعبان ينطي إسمك سكينه
يا عمر جاب العمر
رغم العسر زينات
ما دنگ إلشينه
يا إچفوف أتغازل إعيون اليتامه
إو تمسح إدموع الحزينه
إلرادو إيشيعون نعشك
همه ماتوا...
أتشيعوا ذل إو مهانه
أهل الضغينه
وإنته ذاك شباب
تارس الدنيه مهابه
يمشي أبهيبة زلم
لبتلاثه وإثمانينه
الترنيمة رقم ( 2)
بيك كل شوگ المعامل
يا حنين الزرع لسنون المناجل
يا سنابل من تطخ الراس متروسه السنابل
إشما ثگل وكتك إبهمه
إنته ذاك إنته إلچبير إلما تهادن
بس تجامل
والتجمال شيمة الطيبين
وأطباع إلأصايل
الترنيمة رقم (3)
83 وإنته إهديب
من تحچي قصيده ..
إنته أو صدر ديوان
يا شهامة ناس
ما عرفت الذله
إو للفخر عنوان
شوگ دمهم
خضر أبهور الغموگه إنسان
غاد وي شمس الله نجمه
رسم أجمل مزهريه
أبگاع كردستان
تشهد الكوت أو رقم (1)
والحله إو سجنهه إو نگرة السلمان
علمت جلادك درس
أشلون المبادئ تعني الإيمان
غنيت إعله چتف الموت
وإبأجمل عباره
الما أيزور السلمان عمره خساره
الترنيمة رقم (4)
بويه فدوه إشگد حلو
وإشگد ترف
رغم الوكت وياك قاسي
تنثر الچله محنه
وإنته إبنص المآسي
گلب أبيض حيل
وإچفوفك نظيفه
گلب والد لليحب
إو عاليضد فكرك قذيفه
الترنيمة رقم (5)
دمّك إبكردستان دبكه
إو أغنيه إبهور الغموگه
شوگ عاشگ شوگ إنته
فيض الصوبين شوگ
عاشگ أو عشگه محنه
الوطن والگاع معشوگه
عالي إو غيرك مذله..
حته من يلتف بوگه
وإنته ذاك إنته إلچبير..
الغالي سوگه