ادب وفن

هيبة زمن .. يا حزب / ريسان الخزعلي

*.. هيّ الثالثة والثمانون.
. . . ،
الحزنُ وردٌ في العيون..،
والملحُ بين الجفون.
وإنّ التجاعيد إن لاحت..،
ففي وجه الصبيّ أجمل ما تكون..!..*
*.. الصبح ..
وجه الحبيبه خُبز..
والناس توگف بالشعر خنجر
جبت /الجريده/ حرز
وأمّن رفيف الگلب.. چان إعله حرفك يفز
واشگد عاندت بيك السهر والنوم..،
طعمك مدرسه او بالدفتر إستهلال
وإبأول نشيد إتگوم..،
حته إبغيبتك چتال..!
يا عشگ نهر..والعمر كله إهلال..!
*.. مبارك حين يلثغُ الطفل
مبارك حين يشيخ الصبي..
غير أنّ البذار مودعٌ في الأجنة..*
*.. يغبش الواهس ..
درب مدرسه او حزن الگلب دفتر
أقراك : لليمشي شمس للناس..،
والوحشه التجي..، للبيت لو ليلة مطر
أقراك : وايسافر إبلا ضوه..،
كل العشگ بالروح گامة نهر
وإيدور الحلم وجهي..،
تلعب بالنجم خطوة مهرتك، والمدى إبروحي.
*.. عَصَبٌ ناتئ في كفّ / الرفيق القديم/.
عصب على هيئة 34
كان طرياً .. وقد توازى مع الغيمة الواطئة..!
كم تبدو السماء قريبة من النافذة..؟
وكم كان /قطار الموت/ بطيئاً..؟!
...،
عصبٌ نابض في كفّ /الرفيق الجديد/..
عصبٌ على هيئة 83
كان صلباً.. وقد توازى مع الغيمة العالية..!
كم تبدو السماء بعيدة خارج النافذة..؟.
وكم هي الأرض واسعة قرب ساحة الأندلس..؟!
*.. الورد .. ريحه إو لون مهيوب
او كل اللي نحبّه.. إعله الورد محسوب
إهي هيبة زمن.. مو هيبة ذاك اليوم..،
والهيبه الچبيره /الحزب مهيوب/.
...،
جبناهه محبه..، الما عتگ بيهه العشگ للسّاع..،
عفيه اگلوب تزغر بالعمر مگلوب..!!
بس قمصانه أيام السجن عتگت..،
او ضمينه العتگ عطاب للمصيوب
كل هذا الحزن.. والفرح جاي إنگول..، بويه إنت..،
دگلي إمنين.. من يا ديس راضع.. يا بطن مجيوب..؟!
هذا إستشهد.. إو ذاك گمر مصلوب.
والعدلين باب.. إو /فهد/ ليهسه سماه إمشرّع البوب.!
شتلناهه المعزّه ابغمگ دمع العين..،
وإتراگض خضارك كل غصن بستان..،
والهايم يترس إعبوب..!
مجنونه المعزه.. إشيلحگ اليكره..
يسولف ويه روحه..، ايگول أحبه..،
او كافي عمري إذنوب..1
بالغيبه او همسنه إصياح.. يتلون عله الحيطان..،
- /يا لاعب ولا ملعوب/.
والشارع كبر طوله.. تحضنه اللافته الحمره..
وأغانينه يصفگلهه الطفل والشايب المتعوب..1
لو ظميّت طولك..،
تنفضح بالروح..
يا روح التظمك وانت بالطوفان بأول لوح مكتوب..!
والگاع الوسيعه ابغير وزنك ما صفت گاع..
چا خفّت إبساع.. إو ثِگل خيط الثوب..!
...،
صَمْ /سمسم/.. يلمك چف..،
ولا لمك زمن..، والريحه شهگة هيل..،
تلعب بالهوه إشما يحله بالخاطر..،
/لذيذ الدمع بالشبگات من كل صوب/.
...،
زغير آنه او عرفتك گبل اصابيعي.
حِسبتك .. إنت أولهن..،
حسبتك .. إنت عاشرهن..،
گبل درس المعلم بالدرس محسوب..!
...،
والفرگه عبرناهه رسايل بالحلم..،
والذاكره الترگص هچع.. بالغيبه عيب إتوب../
ليهسه وتر بالكون../ ينده غفوه التاريخ..،
واليسمع عزفنه.. إيلوب مدري ايذوب..!
ما يدري الورد بالعمر.. ريحه إو لون مهيوب
او كل اللي نحبّه إعله الود محسوب
و /الهيبه الچبيره/.. الحزب / يا ماي الوطن/ مهيوب.
يا مهيوب...