وينك يا فرح / حامد كعيد الجبوري
- التفاصيل
- نشر بتاريخ الأربعاء, 17 أيار 2017 19:26
انه براسي حزنگد الفرح
... وأزيد
درّجعن يا سنين العمر
... ياشوگي
يدخول السنه
يا عيد
يا ...كسله
يا عيد الچبير ...
ثيابي يا حلوات
دعابلنه ، الچعاب ، الگلگلي
الطفيره ، والجفره
ليالي المحيه ردّن والمحله اطبول
جيران الطرف والحنه عالبيبان
كل أهل العگد خوان ..
هيبه بكاسر الخوان
ونطوف المحله بيوت ..
تدگ الطبله عالبيبان
نصيح ابصوت عالي ...
ويسمع الله الصوت
( الله يخلي الزغيرون
آمين
وبجاه الله وإسماعيل
آمين
مد ايدچ ، مد ايدچ
سبع محابس بيدچ)
وتدور السنه عگرّب وسم حيّه
يا يمّه المحابس ...
باگت الفرحه
ولچ يمّه المحابس باگت الينباگ
وبيبان الطرف ظلمه !!
وماتت عالمخده احلامنه ازغيرات
وايام الطفولة والدرّس
وسياج مدرستي
ايام الشهايد
ناجح وفرحان
وبراس العگد توگف تتانيني
أركض ... واحضن امي
دموعها امجمرات
ليش اتعطلت يمه
ييمه اتعطلت
رديلي بسماتي
ييمه اتعطلت ضاعن اكتيباتي
يا يمه الوطن ...
شال الهذاك الصوب
يخاف اسمه الحلو ينباگ
يخاف ولايذ ابأالله
شال وخاتل ومرعوب
تجار السياسة وبزرة الشيطان
ينطر باچر الفرحة
بشفاف الزغار
...العيد والأفراح
دولاب الهوه ..
مرجوحة الأعياد
بخدود الزغار
أيهل هلال العيد
امحمل رازقي وقداح ...