ادب وفن

قصيدتان / حسين جهيد الحافظ

1- ليل و سهر
سهر والليل ..
وحشة مگبره إو شاجور
ذبل حسرات صوت العود
بس ناي الحزن .. لمة منايه إتدور
عطشانه السواجي إو نشف ريچ الماي
وأحلام الصبايه إگبور
إگبور
إگبور
مواعيد إلأحبه إگبور
شوغات اليتامه إگبور
حسرات الثكاله إگبور
ممحله الگاع
ماتت شهگة النعناع
حراميه إتنادس نايم الناطور
صگر الحر خطيه
إمن الحدايه إيخاف وأيحاذر
يتشلبه إعله جنحه أيريد فرخ البوم
يطرد بوم ما گادر
ولا گادر يفز مسطور
النسر نام إبخرابة بوم
أو زرازير إلبيوت إنسور
دنيه أتلف مدار أيدور
نطرد بالنحل
وأنربي إلزنبور
هم إو ألم
جور أبجور
أنگطع حس الربابه ...
إو عَزّل الناعور
لا ونه إو تگطر ماي
ماتت عالسواجي إجسور
هذا الصوب ... !!
حصة.. صيته وأم چفات
إو ذاك الصوب .. !!
حصة فتنه بت مشكور
لا شمعه إلتسامر حلم خضر الياس
لا طيف إو يسامر گاع
بت إبيوت ماتت بور
الصور مكثر صورهه إهواي
والحيطان منهه إتجور
ملت من شوارعنه اللافتات السود
متحزمه إبحزنهه أسنين موش أسنين
تمشي إدهور
سل إو سرطان الناس
تاكل ناس يالمذخور
يالمذخور.. يالمذخور
يمك عاد ظلت هاي
سولف وإكشف المستور
ملينه المنايه أتدور
وإصفوف الشباب إو تنتظر بالدور
إصفوف الشباب إو تنتظر بالدوووووور
2- وحشة ليل
وحشه إو ليل يذبح ليل
وإعيون الصبح مكسورة الخاطر
رمده إعيون شمس الله
إو مغتاظ الضوه إمسافر
مو سفرة وناسه سفرة إمهاجر
ممحله الگاع صبخه إو بور
والحاصود ..
من تعب التعب متحزم إيناطر
لا مره الخضر
لا مختار أخذهله الثار
لا إبراهيم إجاه إو لا سلام النار
يا ستار
شنهو الصار
تگتل صفنة الشاعر
ملتهيه القصيده إتناقش المصروف
والممنوع إمن الصرف
والجار والمجرور
والمشطور والشاطر
لا قابيل مرهه إو لا خطف هابيل
حته إو لا أسم باجر
مهجوره الربابه إو حزن صوت الناي
يرگص رگصة إلفاجر
مجنون إليغنّي إو ما عرف شيگول
خطوته إگوامه وي دربه
يغنّي إو حته ما يدري
( كاغد إو جاسه الماي گلبه )
هاي ليش ؟
إو ذيچ ليش ؟
إو ليش كلنه إنعيش ليش ؟
لذيذات الحروف إبچلمة البطران
إو حيران السؤال إبشفة الشاطر
وينه باچر ؟
وينه باجر ؟
هوَ عدنه اليوم حته إنريد باچر!!!