يا حزبنه / شاكر السماوي
- التفاصيل
- نشر بتاريخ السبت, 09 تشرين2/نوفمبر 2013 18:18
هلا إبحزب الشدايد والنوايب والشهاده.
هلا ابتاريخ مجدك والضماير والولاده.
هلا إبحلمك
هلا إبعلمك
هلا إبزلمك
هلا ابشعب الذي إنطاك الرياده.
* * *
حزبنه
يا حزبنه
حزب كل زين تمتحنه التجاريب
يا حزب المعامل والمناجل والمراجل..
والصدگ والطيب
تعلمنه الشهامه منك إو بيك
او تعلمنه الشعب تفديه إو يفديك
او تعلمنه العصر تهديه او يهديك
او تعلمنه الوطن:
بس بيك ينطينه السياده.
***
يل بالناس،
تحيَ...
إو تزدهر...
وتثور.
يبو إنذور العله الجلاد
تعله إشما تضمها إگبور.
نحبك بالغلط والصح
نحبك تنجرح تجرح
يلن غيرك وفي ما صح
إو يلن حبك يدلينه...
عله السچه التجي منها السعاده.
* * *
من آذار..،
كل آذار
وحنه إزغار
وحنه إكبار
يزداد العشگ بينه
وابعز الهجر وانغار
..................
إو لوّن فاتك نصر مرات
إو لون ثگل عدو ابطعنات
ما عفناك بالشدات
ما عفناك بالرّدات
ولا عافت ضمايرنه
حلمها البيك ينعاد إبعَناده.