وفرق ما بينه */ حمزة الحلفي

وفرق ما بينه وبين اليبوگون

وحبنا يفيض بين الناس ويزيد

باستحقاق هذا الحب اخذناه

مو مثل البعض جبناه بتهديد

عالي الصوت الاحمر بين الاصوات

يهلهه الگمر ويباوسه العيد

الظلام اشما تعلى الشمس فوگاه

لو جدحت ضواها اجناحه شيفيد

العراق اصل الحضاره وابو البلدان

مو شارع ركن من دولة عبيد

اچم تيار حطني بحلگ تيار

وكسر ظهر السفينه وعافني ابعيد

بس آني كسرت الموج نصين

وطلعتهم (فهد) من جده وجديد

وطلعتهم سند ويخلص الناس

من شبچة ظلمهم وشجون العيد

وطلعتهم قصيدة شعر من نور

كل مقطع اگوله اسمع بعد عيد

وطلعتهم حقيقه اعلى الخرافات

وطلعتهم عهد مو بس مواعيد

بعد ماكو سنمضي الماضي عفناه

لا احنه مضينا والى منريد

مضينا مضينا الى ما نريد

وطنٌ حرٌ وشعبٌ سعيد

ـــــــــــــــــــــــــــــ

* قصيدة ألقاها الشاعر في حفل العيد الثمانين للصحافة الشيوعية.