باچر عيــــد لو لا ؟!

إي باچـــر عيد .. !

چنـّــه زغار ما نعرف شي، بس نعرف ملابس و أحذية جديدة ، نعرف مراجيح و دولاب الهوى و سينمات و حظ يا نصيب و فرارات ، و فوق السبعة و تحت السبعة ..

چان العيد .. عيدية .. و لفة بيض و عمبة .. أفلام (بودي بود ) و طرزان و زورو و إسماعيل ياسين .. و الشعلة الحمراء و سبارتكوس ..و كاري كوبر ..

ما چانت أكو عمارات عالية ولا هوايه بنيان ولا أضوية إعلانات ، بس چنه نرجع للبيت تعبانين ، فرحانين .. نتواعد على باچر .. يا سينما نروح .. و من يجي الليل نحط روسنا عالمخدة .. و نباوع للنجوم العالية .. و نحلم .. نحلم .. و نغفى وي برد الندى .. !

إي .. چان أكو عيـــد .. محمد و جبار و مزاحم و زكي و نزار و عامر و صباح و فوزي و منذر و نبيل و خالد و علي و وليم و آرام و سلام و توفيق و موفق و واثق .. سلمى و أنعام و لمعان و هيفاء و هناء و عطور و آمال و وداد و نادية و ملوك و سعاد و خلود و عايدة .. زغار أكبر من المسميات و أكبر من الأديان .. محدّ يعرف ، شنو مسيحي ، و منو المسلم ، شنو صُبي و ليش هذا يهودي .. محدّ يعرف ليش صاروا هيــچ .. صرنـــا و كبرنا و محّد من عدنه إختار دينــه و حتى إسمه .. بس إخترنا و عرفنا شلون نضحك نفس الضحكة .. و عرفنا شلون نلعب و شلون نفرح .. و من چان يجي الليل لو سوگ لو سوگين أكو بيها ضوايات، بس چان أكو عيــد ..

چان يعيش ويانه ( سبارتكوس ) .. كبرنـــا و كبر ويانــه .. صحيـــح هوّه سافر .. و راح ، بس إحنه بقينا .. و بقت روحه ويانه تلعب .. تلعب و ما نتعب !

باچــر أكو عيد .. صحيح سافر بعيـــد .. بس لازم يجي و نعيّـــد.. !

***