اثمانين / كريم القزويني
- التفاصيل
- نشر بتاريخ الخميس, 20 آذار/مارس 2014 20:41
إثمانين مو هينه علينه إمن السنين
إثمانين هادي إمن النضال اسنين
احنه مرجحنه المشانق
والمشانق هيه بينه اتمرجحت
احنه صادقنه المراجح..
او هي هم اويانه هم اتصادقت
ما تعب عدنه رفيق
او لا طلع من الطريق
او لا فحط من الطريق..
بعد الحبل عالجرار
او بعده ما گضه المشوار..
إثمانين ربانه فهد من عادل المغوار
الما جفل جلاد يوم..
إثمانين چنه ابظهر أبونه او هسه صرنه اكبار
إثمانين والحفار ينبش
بالگبور اكبار ويه ازغار
چا حته اليموت الناس منه اتخاف والحفار
نظل احنه الهويه او ما كسبنه العار
نظل احنه مناجل تحصد الكفار والاشرار
چاكوچ المعامل واليدگ ستار..
ما بينه الخنيث اليلتفت من حزن
المنشار. احنه اللي بنينه الدار
احنه اللي نمد السفره للخطار..
مو احنه صهيل الخيل من تصهل
مو احنه النهلهل لو گبل مجبل
احنه الحنطه لجوعان والما تقبل المنخل
مو احنه النخاوي او ما نعوف الخل
اثمانين من عمر الحزب ما شاف يوم الذل
اثمانين من عمر الحزب ما شرب ماي الذل
اثمانين من عمر الحزب ما عرف يوم ايزل
لا لا تشتبه عبدال
روح أنشد عله هندال
لا لا تشتبه دعبل..
نظل احنه. لا لا تشتبه دعبل..
هذوله احنه لا لا تشتبه دعبل
چذب ما نموت لا لا تشتبه دعبل..
لا لا تلعب الدعبل
لا لا تلعب الدعبل