جمالية/ ريسان الخزعلي
- التفاصيل
- نشر بتاريخ الخميس, 28 تموز/يوليو 2016 17:25
( 1 )آنه إوياك..
آنه إوياك شبگة عشب..، ما تنطَر..
نسولف ع الشمس والمي.
لبسنه إمن الرمل فد ثوب..،
يا ثوب الزغر../ گمره إو ظلام/.. أخضر
آنه إوياك شبگة عشب..،
مامش كل مچان إيفوت بيه الفي...
( 2 )
أشو.. كلشي..؟!
كلشي إنتَ، كلشي إنتَ، ولا تكفي..!
والكلشي بيّه إلك..،
بصرار جَدّه إنعزل../
گصة شعر واشويه من سَرّتي....،
طوگ وقلم..، دگة حسد ع الزند.
مكتوبه شذري (عَلي)..، وإكتاب ما ينمحي،
بالزعفران إنكتب – خط طلسم إنتَ لي.
مو صُرّه چانت سرّ (يِشن)..، بس بالحفر ينلگي.
كلّي آنه إلك، مو هسه...، بالهرفي.
وإغرگت بأول حلم..،
والگيش كله غمگ، بزغيّرك مشتفي.
...،
اللذه موجة نهر..،
والجرف..، حزّة عشگ../
شامه إبضلع مخفي...
....
( 3 )
حزينه الروح..
حزينه الروح، حزن الكاوليّه إبليلة إتراب
حزينه الروح.. واغيابك تفصله إثياب../
ما ظل لون لآخر ثوب، حدر العين الأسود ذاب
حزن الروح..،
كتبة زعفران إبماي..،
واليقره الحزن يعمه بلايه إكتاب.
حزن الروح..،
مثل السرّه من أمك..،
تظل نيشان .. لا هي جرح، لاهي إصواب
شيفُك الحزن والروح..،
حلوه إلكل حزن مثل العشگ..،
مامش حزن چذاب.
...،
مامش من حلاتك جرس..،
وإنت أكثر حلاه من طيحة المفتاح يم الباب...