عشكـ المري / كاظم لاله
- التفاصيل
- نشر بتاريخ الخميس, 11 آب/أغسطس 2016 20:35
( 1 )گصيبه ..
إتشم سوالفهه المري..
يحبيّبه ماهو إفراگ
ليل، إبلا بواچي او خوف.. ماهو إعراك..!
درب ..،
عاشگ..،
شوگ..،
مشتاگ.
عشگ يقره زمانه إبلا وصل وإفراگ
عشگ..،
بيه الرمل يقره العطش بالماي
سولفنه ..
الرمل بين العطش والماي
سولفنه، حرف وابآخر الدنيه
يتلگه.. سفن/ تعبّها الصبر والريح
يوالفها النجم والليل.
( 2 )
بچيت ..
إو ما عرف بچيي، البچه امن ابچاي
بچيت.. إو لا عرف بچيي، البچه لبچاي
بچيت.. إمن الوطن وإمن الزمن والناس
إو بچيت.. إعله الوطن وإعله الزمن والناس
إو لگيت إبوجهچ التعبان..،
وطن بين الزمن والناس.
( 3 )
تلتف إذنوبي، إبرجَه، نار إو تشبها إشفاف
لا بالهوه تنعگد..
إو لا بالزلف تنراف.
تنشاف بس بالمري، بيك أنعرف وانشاف.
( 4 )
تغسل إذنوبي المري، ما تمحي توبه إذنوب
الغفران، طير إبجنح معيوب، وكته إيلوب
النهران إبمنازلها، تلاگيها مريها إدروب.