كاركتير من وحي أمطار العراق .. مطر.. مطر.. يحكومه / داود أمين

مطر، مطر، يحكومه
إبني سبح بهدومه
والماي طبْ زردومه!
وإنتمْ بسابع نومه !

مطر.. مطر.. يحكومه

مطر.. مطر يمالكي
يلتفتهم.. يكبر ذكي!
بالحصه حطلك كلكِ!
شط المطر دنعومه!

مطر.. مطر.. يحكومه!
مطر.. مطر.. يهل الرحم
لا نفط لا كاز وفحم!
بالبيت لا وذرة لحم!
وأطفالنه المحرومه

مطر.. مطر.. يحكومه!
مطر.. مطر.. ياشاشه
جاري غرك بفراشه
ومن تعصر الدشداشه
تسكي الحقل وكرومه!

مطر.. مطر.. يحكومه
مطر.. مطر يعاصمه
مجلسج ريته بالعمه!
معقوله تذكرنه السمه
وتلبدون مثل البومه!

مطر.. مطر.. يحكومه!
مطر.. مطر.. يالبلبي
أنخّه الله مدري أنّخه النبي؟
مو حركوا أمي وأبي!
وتصيح لا .. لتلومه!

مطر.. مطر.. يحكومه!
مطر.. مطر.. ياوطني
الماي طب.. بأذني
والبوك عدهم علني
وصيف وشته بنص روما!
مطر.. مطر.. يحكومه!

مطر.. مطر.. ياكفره
يا مضحكه.. يامسخره
الناس وصلت للكمر..
وإحنه رجعنه ليوره!
وبنص حلكنه ثومه!

مطر.. مطر.. يحكومه!
مطر.. مطر.. يهل السبح
القهر من صدري طفح
من جيتوا ما شفنه الفرح
وإكلوبنه مكلومه!

مطر.. مطر.. يحكومه!
مطر.. مطر.. ياساده
النهب عدكم عاده
وكلمن يقدم اولاده
ويرمي الشعب بسهومه
مطر.. مطر.. يحكومه