ادب وفن

لمولد حزبي العظيم / جواد القابجي

شيوعي انتَ وضوه للذي.. ضلَّيت
وبگلوب الرفاگه شهم... ضلَّيت
ابفيَّك يامه ع الطيبين... ضلَّيت
خيمة وفه او حُب او عاطفيَّه
فكرك غذّه للعـــــالم... و ورده
اليضدَّك موفقط واطي... و ورده
إلميلادك ألف ورده... و ورده
او تعله فوگ نجمات الثريَّه
********
( أحبَّك ليش .. ما أدري )
سألت اهواي
اسالت جرح الذي انصابيت بي بهواك
کال اسکت .. ولك إترك
وذا صرت ابسبب بلواك ..؟؟
بس جرحك يونِّسني
وذا جرحك وِنِس ..
چا منهو يبعدني !!
عرفت اشما أصيحن آه ..
اشوفك صور
بشرايينِّي تسري ..!!
صرت إنتَ هواي او سلوتي او عشگی
بعد أسأل عليمن ..
ونته لبصدري ..!!
يمن بيدك مشاعل عالظلام اتشِد
أشعل إلك روحي اشموع للمولد
يا فكر الشغيله او هوه الحرَّيّه
يا شاغل فكر كل الحراميَّه
قريتك شمس مطبوعه ابوجه مظلوم
دعوة مُحِب قلبيَّه
او قريتك شهم للمحروم
وحگ بيرغ الشرجيَّه ..!!
شفته ايلوذ بكتارك
شفت يستظل بفيايك
على اچتافك حملت اهموم
ما هدَّك برد .. لا وگَّفك مسموم
صرت غيم او تروِّي الناس بَمْطارك
صرت ديوان خُطّارك ..
او تبقه ابعز شبابك دوم
شاب اوتكبر افكارك
وكل اگلوبنه يالمُحب خطّارك ..