العش / كامل الركابي
- التفاصيل
- نشر بتاريخ الأربعاء, 03 أيلول/سبتمبر 2014 19:41
عشي مهجور بغيابك
وانه طيره
بيتي وحشه
واختفت من الوجوه
البسمه
والضحكة الزغيرةه
النار شبت بالضواحي
وانت ضاحيتي
وبلادي المستعيرةه
ثياب غير اثيابها
ملحة وگصيره
ورافعة الرايات
سوده
مو حزنها على الحسين
ولامصيره
لا اله الا الله صارت
سيف
بچفوف الدواعش
والعشيرةه
چان ذابحني غيابك
هسه عش مهجور
ارحم
لاشجر
لانخله
ظلت
ينبني ابطلـّتها عش
وغايب
اسلم
هدب بعيوني
خيالك
ينام يصحه
وي الرمش !
********
اثـر دكات
وجدان النقيب
شلون تروح ..؟
وبعد بايدك اثر دگات گلبي
مخاويات الروح
وبعد دمعي اعله صدرك طاح
خل ينشف ويله تروح
وقصايد كملن بطاريك
وعطر بس الك چان يفوح
وگلب شاعر تلچعه الآه
ويسترسل بعد بالنوح
ونبض عاشگ غزاه الويل
ميهمه أثر الجروح
دمع جفنه (تداوه ليل) ينزل
بس الك مسموح
حديقه يناشد بهجرك عليه
وصوته چن مبحوح
ما جايتك ذكرى وصوت
خازن الك چان البوح
ما لاحتك نسمه شوگ؟
مكتوبه لگليبي تلوح!
آنه بروحي حزن معروف
بونة حمام الدوح
تحملت اليتم طفله
وعليّه تعود آنه النوح
احچي بمنطق العشاگ
بعدك هذا ما مسموح
ولا تعتذر عن الراح..
ما تجبر گلب مذبوح
البقانونك أصلاً زيف
ما مطروق ما مشروح
الغدر سواني مثل الغيم
ما يعلن علي السفوح
الجرح شگ بيه ذكرى وطاب
الله وياك .. لتظل روح