يا سعدون..!! / ناظم السماوي
- التفاصيل
- نشر بتاريخ السبت, 20 كانون1/ديسمبر 2014 20:07
الغالين ميرخصون..
ولا بالعازه يعتذرون..
ذهب.. والذهب ينقرض.. ذهب..
منهم اذا مديون..
فضه امطشره اعله الماي..
وبخد الفرات ودجله يتلاگون
واذا چفه اليمنى اتفيض..
نبعه ماي..!!
تخجل يسرته.. وتفيض..
عشر اعيون...
ثوب إمن النجاب امفصل..
او يه الطول..!
إتحير امنين تبدي اشلون ينباسون
توضه العشگ بيهم
والمحبه اسرار
ليل وحلم دافي إبگذلة اليهون
ولو طاحت انجوم البسمه للگاع
كل واحد بالف نجمه
سمه ايصعدون
ومن تتوازه نخوتهم تدگ البوب
واحد واحد
اعله الموت يتوازون
غيرة فهد تتقدم بأولهم
ويجي، حازم، سلام، وصارم
وسعدون..
يتراب الوطن.. عيب اعله جرح الگاع
ما تنبت شجر بلوط
على اليوفون
يتراب الوطن خيط الشمس معگود
عله اطراف الگصايب
شذر لليهون
وطيبتنه نهر.. بالشفه تگطر ماي
للعطشانه اشافه
وبير لليروون
يا سعدون
ضميناك ذخر العازة الايام
هم إنجيب مثلك
ذخر يا سعدون؟
يا سعدون. ظل صبر الحزب ما رخص
وكت الضيج
ولا مره ابحياته رخص يا سعدون
لان زلم الحزب.. مثلك
زلم بالعازه
يتناخون
يا سعدون
من سعدون.. سافر
ترك بس قاموس
ترك موقف مهابه.. ابدمه
صار اشموس
ترك كلمة وداع إباب حزب الناس
ضمير الحزب ما ينباع
ولا يدخل مزاد.. وينشره بفلوس
ومن سافر ترك.. برنو بچفه
ما خطه تاويّ الصوت
وتعرفه الأنصار
لكل هدف جايوس
هو اربات صبر الحزب.. ويه الموت
توضه الشرف بسّمه
وأخذ منه ادروس
كلشي البيه انيق .. ابگد
ملح بغداد..
هويه امن الشرف بسم الحزب مكبوس
يا سعدون..
من ساس الضمير .. انته
صرت ومشيت
ومن اشواگ عطرك
صرت شربت سوس
لان انته وهج من ملح
هاي الگاع
ومن تاريخ حزبك ما طفه الفانوس
دمك توج الگمره.. ابغصن زيتون
ومن دمك تعله
ابهيبته الناموس
احنه احلوگ تحچي
ابزود حزبك يلعزيز اسنين
فضلنه الشهاده ولا..
اچفوف انبوس
ملك الموت چم مره
يدگ باب الشيوعيين
وملك الموت بالتالي
طلع جاسوس
يا خيال. حزب الشعب.. أحنه وياك
نهر من المحبه و بس
عسل متروس
يا سعدون.. يابو الخوه يا سعدون
ما نبچي عليك
ولو بچينه اشلون؟
لان عدنه البچي..
اباب المقر محبوس
يا سعدون .. بيتك
بيت حزبك
بيت كل الناس
ويظل بيت الحبايب
بالورد مغروس