هذا وطنـــا / رياض النعماني
- التفاصيل
- نشر بتاريخ الأربعاء, 26 آب/أغسطس 2015 21:06
وبساحة التحرير.. ،طاير نشوه يتكلب حمام الفرح
هب بالكلب ليفوك ، فوك وسرح
. الدنيا كلها اسطوح ، واضوايات.. والليل بنسيم
انجرح
زركه السمه.. والهوى ايهلهل بالزراك.. ودجله زركه
وازرك الليل الترف
جايين من كل جهه ولف الولف
سدوا المدى ،
سدوا الجهات.. وكلشي ، كلشي
صوت الشعب زلزال يكلبها.. ويظل للنصر يمشي
سدوا دربنا بالغنه انوسّعه
الروح طير وجاي للحريه.. من يمنعه
كامت أيام القهر
ظلمتوا هذا العمر
ساعد شعبنا بحر
باجر.. يهد بيوتكم
الجوع صاح ، وشعل نار ابوبكم
ردوا اللي بكتوا.. حتى لو زوجتوا بيه اولادكم
كل العمارات البنيتوها ..ترد للشعب
كل اللي هربتوا ، والبكتوا ايرد للشعب
ما يغفل الناطور.. مايطفه هذاك اللهب
مابيكم من الوطن ريحه
و أثر دهله
ما ظن شربتوا يوم من دجله
من هالوطن كل ذره ما بيكم
جن ذيبه... لو عكربه هي اللي رضعتكم
يا شعب .. رسّك مو هذوله ، وهم مو رِسّه
هذا وطنا.. هو اسمنا
وهوْ اصلنا
وهوْ مجدنا
وهوْ عمرنا .. بروحنا انحرسه
وذوله رصيف ولازم انكنسه.