حنيت الك يا وطن / د. شاكر المعموري

حنيت الك يا وطن يالما توصقه احروف

حنيت مثل الطفل والشوفتك ملهوف

طوفان صار الوكت جرف البحر مخطوف

مثل النبع شوفتك ميك عسل صافي

يا گمر بين النجم انته ضوه اعيوني

صرت انه مثلك اون بشعير باعوني

مثل الشتال برمل بالفلا شتلوني

والدهر ميه خبط ما ضل اليوافي

يا دار حبنه ذبل علك ابجنحه او طار

والليل چلچل علينه اوما دره بالصار

والجار اوجر علي كل البله من الجار

واشوكت يصفه الوكت كل هذا مو كافي؟؟؟

يا دهر بسك قهر يا دهر ملينه

وخيام من الحزن يا دهر سوينه

واحنه بنينه ابتعب واحنه اللي ربينه

تاليهه صافي صفت للسختجي الحافي