تهنــــــــــــــه .. وما نِتيـــــــه ! !/ صلاح جبار عوفي

تـِهنه ، وحْـنـَه الندَلـِّي ، دِليل البـَــــرْ

تهنه وسنين العمر ، دولابها يفتــــــر

تهنه !! ومـُو بـِدَينـَه وما نريد إنتيـــــه

بس طوفان غطـَّه الگاع ، خلـَّه الناس تتطشـَّر

وحگ ناس العراق إلما لِـحگها الگـَيـــش

وحگ كِلمن فرش روحه للوطن مَعـْبــَـر

وحگ عيناك " يصويحب "، يا بَيرغ الشرجيَّة

ندري " سعود " غـَصبـَنْ عاف المگــيـَّـر

ندري إبـَّيرَغــــــك يتعلـَّـــــه بالكـَلفــــــات

هوساتك تشيــــل النـــاس ، من تعثــــــر

وندري برفيجــــك والحبيـــب " عراگ "

حاطنـَّـه الضواري ، بعيـــون تجدح شـــر

يلاويهن ، ما يــِـريد إيطيح " الـعراگ "

لن يدري بطيحـِتـَه الأشراف تِـتعـَيـَّـــــر

لا تزعل " حمد " يا خـُويْ ..! لا تزعـــل

لون رَيلك على السچــَّـــه تعثــَّــــــــــــــر

شْما طـوَّلْ زَعلنـَـــه وْزِعْلـَـت الأيــــــــام

لابـــد ننتخي ، والريــل إيـــرد يگعــــر

يــِـرِدْ هــاون سَلـَـفنَـه يــِـطِــشْ الهيـــل

نذر لعيون الشهيد إوْبَيرغه الأحمــــــــر

يرِدْ المـــاي ، والبردي والصيــــــــــاد

گصَبنَه يحضـِنْ السفــــان لو حـــــــــدَّر

ترد الناس ، تحضن من فرحها الگــاع

وبنسمــــة ثنايـــا الهــور تتعطـَّـــــــــــر

لن عشگ العراقي الگــاع والشطيــــــن

كل بوسة عشگ لترابهـــن عـَنـبَـــــــر