قصايد أخيرة / كامل الركابي
- التفاصيل
- نشر بتاريخ الأربعاء, 14 كانون1/ديسمبر 2016 20:03
البرد
برد برد
وين
ماتمشي برد
بالشوارع
برد ازرگ
ومن كثر ماتمشي
مو
انت
الثلج عل جسم
يعرگ
والشجر
بردان
والغابه
نحيفه من البرد
برد ابيض
يغفه ع الرجلين
وتصير المفاصل
بالالم
مخمل سريره
ونتفه نتفه
من الثلج
تظهر جزيره
بجسمي
واعيوني
على الشمس
البعيده
الغايبه
اتگللها:
يالله وياي نوحي
الشته مو عالباب
يمعودين
هذا الشته بروحي!
القصيدة
چنت اخاف
أكتب قصيده
وهسه
هيّ اليوم
تكتبني
وتخلّيني
بالف صفنه
وتروح
چنت أفكّر
بالمعاني
الكلمات
وهيّ ما همها
بسطر واحد
تبوح
المختبي
المخزون
من صرخة
الروح!
تعريف
ردت تعريف
العلاقة روحي بيك
تعريف
العلاقتنه القديمه
انه گتلِك :اصدقاء
وچنت اخبّي
انتي گلتي : لا حبايب
وانت حبي
وانه احبك
مثل كل الاصدقاء
بس فرق انت النهر
همّه
شوايخ
وانه من ذاك الوكت
لليوم
دايخ
وگلبي
مو سر
يعترف
بأغرب هزيمه
مالگه توصيف
العلاقتنه
القديمة !
شي غريب
كلها ماصدِّگَت
انت
الغامرت
بيّ وبعتني
حتى انت
وكلها ماصدِّگَت
انت السافرت
بيّ
مداين
وبرصيف اول
عفتني
حتى انت
وكلها ماصدِّگَت
عن
قصة هوانه
حتى آنه !