شباب الثمانين* / ناظم السماوي
- التفاصيل
- نشر بتاريخ الجمعة, 10 كانون2/يناير 2014 12:57
الحزب
يعني الكمر ونجومه حراس
وكل نجمه عله اعيونه تلالي
اذن .. يستاهل انحطه عله الراس
تاج وهاذه واقع مو مثالي
وعله اثمانين عمره نشرب الكاس
او نوشل الكاس حتماً للتوالي
واكبر تجربه الحبوه إكبالي
* * *
الحزب .. فلاح يبقه او چفه غراس
جنوبي اتشوفه مره لو شمالي
لذلك من نسعره يرخص الماس
واليشري يفكر ليش غالي؟
العمل ..
النادره .. بالسوك تنقاس
من عرض وطلب تنعرف تالي
وحزبنه احسابه يصعب ماله مقياس
والتقدير .. يرجع يم.. سؤالي
التقدير.. للعاش ابزمانه اوياه بمساس
او صعد للمشنقه وكلهه تعالي..
* * *
الحزب
او داعتك ميهمه دناس
او ميهمه الوضع ولا ما يبالي
الحزب.. عريس يبقه او حزنه اعراس..!
وباسمه صعدنه للمعالي..!
الحزب.. طيب او محب وبعد لا باس
الحزب.. صوتي او هلي وّعزي ودلالي
الحزب .. بالشده چان اوياي نبراس..
انتخه باسم الشعب من انتخالي..!
* * *
الحزب.. خد الحديثه او شعر مياس
نهر يجري ذهب والمتن چالي
الحزب.. وردة الجوري إمعطره بياس
او دفو للفقره من برد الليالي
الحزب .. من عامه اللّول بيت جُلاس
يفيض افكار يا قوت ولآلي..!
إذا أمتحن بسمه بألف كراس
چا .. بعد اشبعد منه بقالي
واذا .. اخدود الحزب.. بالعيد تنباس..!
اكيد الطعم شربت برتقالي..!
* * *
وعله اثمانين نبني.. وندري بالساس.!
الف طابق علو .. واكثر بنالي..!
اليعادي الحزب ندري يعلن افلاس
وكبلهم .. چان أبو زيد الهلالي..!
يمعودين كافي.. وهاذه وسواس
والوسواس مو واقع خيالي
الحزب يعني الفكر.. إموثق بقرطاس
اشتراكي.. الحزب .. لا مو رأس مالي.
ـــــــــــــــــــــــــــــــــــــــــــــــــــــ
* القيت في الاحتفال بذكرى انتفاضة الحي 1956 يوم الجمعة
الماضي