هلهولة عرس آذارية لاينطفئ نورها وبهائها، شامخة مثل شموخ نخل البصرة وجبال كردستان، باقة ياسمين لا يختفي اريجها منذ اكثر من ثمانين عاماً، زاهرين كالورد لأنهم ينهلون من نهر الشعب المتدفق، ابداً سنبقى نردد

سالم حزبنا ماهمته الصدمات يخسه اليضدنا الشعب حي مامات...

آذار

هلا بآذار

بيرغ للنشامة وصرخت الأحرار

سيف أمولم الهدات

مايرتد عزيز الروح

مايرتد على جفوف المنايا دار

امناغة وهزة الكاروك

مهرة اتغير

مهرة مسرجة بتاريخ

تصهل مايهمها الصار

ذهب حجيّة

سواليفة حزم عمال

مناجل ثورة الفلاح

مجرب بالغموكَة وثورة الأهوار

مايجفل ضواه أيظِل

عَلم ثوار .. أبو الثوار.. الف جلمة .. أبو التاريخ

ياخيمة شعب تذكار

ياعمر النسولف بيه اثنين وثمانينك

نبدي امنين .. نبدي بثورتك تموز

صريم وشوك ماهمك

مناجل والتفك مكوار

ماهمك سجن لا موت

ماهمك رياح الشر .. ولا نكبات سجن الكوت

صار الدم رجاب انهار

صيهود الزم شجعان

ماهمها رصاص ونار

يدرون العمر مشوار

والأشرار

ياعار وخزي ياعار

ياعمر الوفي يل فوكَ ال اثمانين

اكبار ازغار

جم شمعة نضويلك يلمدلل

عطر المسج يبرالك

شمعة اتضوي ياويلاخ

على الراحوا

على اعواد المشانق زفة ابطالك

عطر الجوري يبرالك

ماماتوا ولا نشغوا

ولاجنّ المنايا بلحظة تدنالك

هلة بالموت .. زلم وتربوا ابجالك .. هنيالك

وفي ومجرب الشدات

تستاهل بيابي العين

يابيرغ شرف العفة تحلالك

من يوسف فهد حنّه المشانق هيل

يردس على المنية حيل

ماهمه ظلام الليل .. نجم سهيل .. هنيالك

وحسين الرضي ياضيغم افعالك

سواجي الروح تجرالك

عزيز وداعتك انت

عزيز وداعتك ماجن لفاك البين

ولاجن النوايب جلجلن دارك

ولاجن الحقد وشباط ريح الشر

مر ابحرثتك ويهدم اسوارك

ولاجن الدمايا ترسن النهران

واذياب الغرب اتمرعد اعيالك

تظل انت نجم ماطاح

شمس ماتغيب

كمر ضاوي على درب النضال وحيد خيالك

الف مبروك عمر اللي تخطى اثنين وثمانين

كل عام اليكوا أنا

اشباب وشايلة الديوان

ماهطلت ولاهمها قتل وموت جمالك

هذا انت جبل عالي

سيف مجرب وهادود

هذا اليخطر ابالك

ماهمك شباط الموت والطاعون

سواجي الدم

ماهي دموع سيالك

شباط الذيب .. آخ الذيب

ياقصر النهاية اشهد

يل ملعب الأولمبي احلفك بيش

سولف خسة رجالك

دولاب الوكت يفتر

سكتت ياعار افعالك

ياحزب الفلح والناس والعمال

تظل انت الشعب والناس كل الناس

رفعت راس

ذهب ومرصع بالماس

لبنادم لكل الناس الطيبين.... اعيدَنكْ

جبت كل الرفاق وجيت متعنين

جبت حازم جبت صارم جبت ستار

جبت كل اليتامة وصولة الأنصار

جبت وياي فريال وحميدة اعذيبي محتفلين

جبت البصرة كلها وعايدة ياسين

متعنين شهديلك ينور العين

شموع وياس .. حفنة تراب من اجبال كردستان

برحي ابريم من حمدان

من دجلة وفرات السيلهن مرجان

من ابطال بشتاشان

كلها ناسك الشجعان

تستاهل وتستاهل وتستاهل

تستاهل يتاج الراس

تبقى انت عجيد الدار

تحمل راية الأوطان